Braziliyaning ba’zi hududlarida mamlakat uchun rekord darajada past haroratlar qayd etilib, qor yog‘di, havo yanada sovib ketishi kutilmoqda, deb xabar beradi “Interfaks”.

Sovuq havo Braziliyaga 28-iyul, chorshanba kunidan kirib kelishni boshladi, shu kuni Kampu-Grandi va Florianopolis shaharlarida harorat bo‘yicha rekordlar o‘rnatildi. Santa-Katarina shtatining o‘ndan ortiq shaharlarida qor yog‘di, mahalliy aholi bunday noodatiy manzaradan bahra olish uchun ko‘chalarga chiqdi. Riu-Grandi-du-Sul shtatining esa 30 ta shahrida qor yog‘ib, harorat nol darajadan pastga tushdi.

28-iyul kuni Braziliyada eng past harorat San-Joakim shahrida qayd etilib, u -7,8 darajaga teng bo‘ldi.

Mamlakatga kuchli yomg‘ir yopirildi. Ba’zi hududlarda katta-katta do‘l va ho‘l qor yog‘di. Ko‘chalarni qor qopladi.

30-iyul, juma kuni sovuq havo yanada kuchayib, Portu-Alegri, Florianopolis, Kuritiba, San-Paulu va Kampu-Grandi shaharlarida esa harorat 5 darajadan pasayishi kutilmoqda.

Braziliya hukumati, prognozlarga ko‘ra, 1995-yildan buyon eng kuchli bo‘ladigan sovuq havo to‘lqiniga tayyorlanmoqda.

Avvalroq Afrika janubida rekord darajada sovuq havo qayd etilib, qor yog‘gan edi.