Toshkent viloyati Qibray tumanida 5 kishini o‘ldirganlikda gumon qilingan shaxs ushlandi, deya xabar bermoqda Bosh prokuratura.
Qayd etilishicha, 2021-yilning 29-iyul kuni, taxminan, soat 01:20 larda Qibray tumani IIB navbatchilik qismiga Qibray tumani, “Istiqbol” MFY, Humo ko‘chasi raqamsiz uyda yashovchi Ernazarovlar oilasida sodir etilgan qotillik jinoyati yuzasidan kelib tushgan xabarga ko‘ra, tergov-tezkor guruhi hodisa sodir bo‘lgan joyga yetib borgan.
Borilgan uyda o‘tkir tig‘li, kesuvchi-sanchuvchi jism bilan jarohatlangan holdagi xonadon egasi 1960-yilda tug‘ilgan E.A., uning ikki qizi — 1986-yilda tug‘ilgan A.M. va 1988-yilda tug‘ilgan E.M. hamda 1997-yilda tug‘ilgan o‘g‘li E.A. murdalari mavjudligi aniqlangan.
Shuningdek, mazkur xonadonga yollanma quruvchi usta sifatida kelib, ishlayotgan 1984-yilda Farg‘ona viloyatida tug‘ilgan K.K.ning murdasi ham topilgan.
Sodir etilgan jinoyat yuzasidan o‘tkazilgan tezkor surishtiruv ishlari davomida olingan dastlabki ma’lumotga ko‘ra ushbu jinoyatni I.Sh. sodir etganlikda gumon qilingan.
Bosh prokuraturaning ma’lum qilishicha, mazkur holat yuzasidan Toshkent viloyati prokuraturasi tomonidan Jinoyat kodeksining 97-moddasi 2-qismi “a, j” bandlari (o‘ta shafqatsizlik bilan ikki yoki undan ortiq shaxsni qasddan o‘ldirish) bilan jinoyat ishi qo‘zg‘atildi.
Gumonlanuvchi shaxs protsessual tartibda ushlangan. Tergov harakatlari olib borilmoqda.
Bundan avval Namanganda odam o‘ldirganlikda gumonlangan shaxslar Toshkentda qo‘lga olingani, Andijonda shar’iy nikohdagi eri boshqaga uylanayotgani uchun uni o‘ldirgan ayol 10 yilga qamalgani hamda Jizzaxda mast holatda tanishini pichoqlab o‘ldirgan erkakka jinoyat ishi qo‘zg‘atilgani haqida xabar berilgandi.
Izoh (0)