Shavkat Mirziyoyev sharoiti og‘ir bo‘lgan mehribonlik uylarini tegishli idora, hokimlik va vazirliklar otaliqqa olishi haqida topshiriq berdi.
“Bir oy muddatda har bir mehribonlik uyi va bolalar shaharchasi kamida 20 tadan eng zamonaviy kompyuter va tezkor Internet bilan ta’minlansin.
Bir oy muddatda har bir mehribonlik uyi va bolalar shaharchasi Inxa universiteti, Axborot texnologiyalari universiteti, IT markaz va parklarga bog‘lab, o‘quv kurslari tashkil etilsin.
Moliya vazirligi har bir mehribonlik uyi va bolalar shaharchalariga o‘z tizimidagi ikkitadan mutaxassisni doimiy biriktirib, o‘z vaqtida moliyalashtirish va ajratilgan mablag‘larni samarali ishlatishga javob beradi.
Bundan tashqari, sharoiti og‘ir bo‘lgan mehribonlik uylarini Prezident Administratsiyasi, Vazirlar Mahkamasi, viloyat hokimlari otaliqqa oladi.
Masalan, Prezident Administratsiyasi – Yashnoboddagi 30-son, Vazirlar Mahkamasi – Yunusoboddagi 23-son, Davlat xavfsizlik xizmati – Bo‘kadagi 15-son, Bosh prokuratura – Samarqand shahridagi 1-son, Chegara qo‘shinlari – Buxoro shahridagi 32-son, Favqulodda vaziyatlar vazirligi – Marg‘ilondagi 1-son, Bojxona qo‘mitasi – Qo‘qondagi 12-son mehribonlik uylari, Mudofaa vazirligi – Andijon shahridagi bolalar shaharchasi bilan shaxsan shug‘ullanib, yil yakuniga qadar ularning barcha muammolarini hal etib beradi”, – dedi Shavkat Mirziyoyev.
Shuningdek, mehribonlik uylarida tarbiyalanayotgan qizlarni hayotga tayyorlash vazifasi Mahalla va oilani qo‘llab-quvvatlash vazirligiga topshirildi.
“Mehribonlik uylarida tarbiya olayotgan qizlarimizning ta’lim-tarbiyasi, ularni balog‘atga, turmushga tayyorlash Mahalla va oilani qo‘llab-quvvatlash vazirligining asosiy vazifalaridan biri bo‘ladi.
Ushbu qizlarning barchasi ‘ayollar daftari’ga kiritilib, ularni qiynayotgan masalalarni joyida hal qilishga hamda mehribonlik uylaridan keyingi hayotidagi o‘z o‘rnini topishiga har tomonlama ko‘maklashiladi”, – deydi Prezident.
Mavzuga doir:
Izoh (0)