Farg‘ona viloyati hokimi Xayrullo Bozorov bir oydan ortiq davrdan beri jamoatchilik ko‘rinish berayotgani yo‘q. 28-iyul kuni esa ijtimoiy tarmoqlarda hokim tadbirkordan 400 ming dollar pora olayotgan vaqtida qo‘lga tushgani, shu sababli ham ko‘rinmay qolgani haqida xabarlar tarqaldi.

Xayrullo Bozorov.

Foto: “Daryo” / Madina Nurman

Farg‘ona viloyati hokimligi matbuot kotibi Dilmurod Jumaboyevning “Daryo”ga ma’lum qilishicha, hokim Xayrullo Bozorov 27-iyundan buyon Toshkent shahrida chuqurlashtirilgan tibbiy davolanishda. Qayd etishlaricha, Bozorov poytaxtda sekvestrlangan bel umurtqa churrasi tashxisi bilan bel sohasida kichik jarrohlik amaliyoti o‘tkazgan.

“Xayrullo Bozorov hozirda statsionar sharoitda reabilitatsiya jarayonini o‘tkazmoqda, ishlarni masofadan onlayn tarzda muvofiqlashtirib bormoqda. Yaqin kunlarda viloyat hokimi odatiy ish faoliyatiga qaytishini ma’lum qilamiz”, — deyiladi viloyat hokimligi matbuot xizmati axborotida.

Ayni vaqtda, Farg‘ona viloyati hokimligi jamoatchilikdan ijtimoiy tarmoqlarda hokim Xayrullo Bozorov bilan bog‘liq tarqalayotgan mish-mishlarga ishonmaslikni so‘rab, yolg‘on axborot tarqatganlik uchun ma’muriy va jinoiy javobgarlik ko‘zda tutilganini eslatib o‘tgan.