Betakror aktrisa Keyt Bekinseyl 48 yoshda ham jozibali ko‘rinishining siri nimada? (foto)

O‘z davrida romantik filmlarning etalon-qahramoni bo‘lgani Gollivud aktrisasi Keyt Bekinseylning go‘zallik siri haqida ma’lumot beramiz.

Keytning bolaligidanoq vazn bilan bog‘liq muammolarga duch kelganini eshitib ajablanadi kishi. Keyt otasini juda erta yo‘qotdi, otasi vafot etganda u olti yoshga to‘lmagan edi. Onasi ikkinchi marta turmushga chiqdi va o‘gay otasi uning ijodiy ishlarini qo‘llab-quvvatlagan bo‘lsa-da, Keyt onasining bu tanlovi bilan kelisha olmadi. Bir muncha vaqt u ovqat yemay qo‘ydi va anoreksiya holatiga kelib qoldi. O‘gay otasi Roy Battersbi o‘jar qizchaga yordam berishda ajoyib sabr-toqat va otalik mehrini namoyish etdi. Uning yordami bilan Keyt nufuzli kollejga o‘qishga kirdi, adabiyotga qiziqdi va hatto yosh yozuvchilar tanlovida final ishtirokchisiga aylandi. Aytgancha, Bekinseyl havas qilarli ma’lumotga ega: kollejdan so‘ng u Oksforddagi fransuz va rus adabiyoti fakultetiga o‘qishga kirdi.

Aqlli, chiroyli va sobitqadam qiz ko‘p yillar davomida romantik qahramonlar obrazida namoyon bo‘lgan. Hammasi “Boshqa dunyo” epopeyasida bosh rolni o‘ynash taklifi tufayli o‘zgardi. Uning ijrosidagi charm kombinezon kiygan Selin obrazi kinosanoatning eng jozibali qahramonidan biriga aylandi. Natijada Keyt bir zumda dunyodagi eng chiroyli ayollar ro‘yxatiga kiritildi. Qizig‘i shundaki, aktrisa hali ham ushbu maqomni saqlab qola olgan. Aytgancha, u o‘zining go‘zallik sirlari bilan bo‘lishishni yoqtirmaydi. Ma’lumki, Keyt sportning ashaddiy muxlisi. Uning bir kuni ham mashg‘ulotlarsiz o‘tmaydi, kelishgan qaddi-qomati esa buni tasdiqlaydi.

Keytning ovqatlanish tartibi ham unchalik oddiy emas. O‘tmishdagi muammolari sababli Keyt uzoq vaqtgacha go‘shtdan voz kechgandi, ammo keyin u yana iste’mol qila boshladi. Aktrisa o‘zini energiyaga to‘la his qilish uchun o‘simlik oqsillari yetarli miqdorda emasligini tan oldi. Bekinseyl shirinliklarni yaxshi ko‘radi va o‘zini tez-tez siylab turadi, keyin esa sport zaliga yuguradi.

“O‘zining tug‘ilgan kunida ham bir bo‘lak tort yeyolmaydiganlardan biri bo‘lishni istamayman”, — deb hazillashadi Keyt.

Aktrisa plastik jarrohlik va go‘zallik ukollarini rad etadi. Aktrisa rad eta olmaydigan yagona narsa bu — yuz parvarishi uchun kundalik niqoblardir.