eBay orqali amerikalik reper Kanye Uestning Donda nomli yangi albomi taqdimoti vaqtida yig‘ilgan havo sotuvga qo‘yildi, deb xabar beradi Esquire.

Foto: Getty Images for Universal Music Group

Paketga yig‘ilgan havoni @Imacanon16canz nikli foydalanuvchi sotmoqda. Sotuvchining eBay’dagi e’loni ostiga hozirgacha 21 ta izoh qoldirilgan bo‘lib, ularning barchasi — ijobiy. U havoni 3330 dollarga sotish niyatida. Auksion to‘rt kundan so‘ng yakuniga yetadi, ayni vaqtda unga 2125 dollar taklif etilmoqda.

Bu reperning muxlislari Uest ishtirok etgan tadbirdagi havoni sotayotgan birinchi holat emas. 2015-yilda eBay orqali musiqachining Yeezus turi doirasida “qadoqlangan” havosi 60 ming dollarga sotilgan edi.

23-iyul kuni Kanye Uest Atlantadagi stadionda o‘zining to‘qqizinchi — Donda albomi taqdimotini o‘tkazdi. Biroq reper uni hali oxiriga yetkazmagan, shu sababli plastinka relisi 6-avgustga ko‘chirilgan. Musiqachining o‘zi esa Donda ustidagi ishni oxiriga yetkazish maqsadida stadionda yashamoqda.

Avvalroq Netflix Kanye Uest haqidagi hujjatli filmni namoyish etish huquqini 30 million dollarga sotib olgani, film 21 yil davomida yaratilgani to‘g‘risida xabar berilgandi.