Akademik Nusrat Parpiyev 90 yoshida vafot etdi

Atoqli olim, O‘zbekiston Fanlar akademiyasi akademigi Nusrat Parpiyev 90 yoshida vafot etdi, deb xabar beradi O‘zA.

Nusrat Parpiyev 1931-yilning 14-oktabrida Toshkent shahrida tug‘ilgan. 1953-yilda O‘rta Osiyo davlat universitetini, 1956-yilda Moskva davlat universitetining aspiranturasini tamomlagan.

Bo‘lg‘usi olim o‘z mehnat faoliyatini Fanlar akademiyasining Yadro fizikasi institutida kichik ilmiy xodim sifatida boshlagan va qariyb 70 yillik faoliyati davomida Kimyo instituti, O‘rta Osiyo neftni qayta ishlash sanoati ilmiy-tekshirish instituti, Buxoro oziq-ovqat va yengil sanoat texnologiyasi instituti, Toshkent kimyo-texnologiya instituti, O‘zbekiston Milliy universitetida mas’ul lavozimlarda mehnat qilib, mamlakatda noorganik kimyo sohasidagi dolzarb masalalarni tadqiq etish, yuqori malakali kadrlar tayyorlash ishiga munosib hissa qo‘shgan.

Nusrat Parpiyevning muallifligida kompleks birikmalar kimyosi yo‘nalishiga bag‘ishlangan 750 dan ziyod ilmiy maqolalar, 7 ta monografiya, 22 ta mualliflik guvohnomasi va 3 ta patent yurtimiz va xorijiy mamlakatlar olimlari va mutaxassislari tomonidan yuksak e’tirof etilgan.

Uning rahbarligida 50 dan ortiq fan nomzodlari va fan doktorlari tayyorlangan.

Avvalroq O‘zbekiston Fanlar akademiyasi akademigi Mirhoji Asqarov 89 yoshida, akademik Ra’no Ubaydullayeva 84 yoshida, akademik Shavkat Akmalxonov 87 yoshida vafot etgani to‘g‘risida xabar berilgandi. Shuningdek, O‘zbekiston Respublikasi Fanlar akademiyasi akademigi, adabiyotshunos olim To‘ra Mirzayev 2020-yil 29-sentabr kuni 84 yoshida, O‘zbekistonda xizmat ko‘rsatgan fan arbobi, O‘zbekiston Respublikasi Fanlar akademiyasi akademigi Tursunboy Rashidov 7-oktabr kuni 86 yoshida vafot etgandi.