Video: Jennifer Lopes 52 yoshini nishonlagan 130 million dollarlik yaxta qanday ko‘rinishga ega?

Xonanda va aktrisa Jennifer Lopes 2021-yilning 24-iyul kuni 52 yoshni qarshiladi. Tengdoshlariga nisbatan ancha yosh va latofatli ko‘rinadigan xonanda tavallud ayyomi munosabati bilan Valerie nomli yaxtani ijaraga olgan.

Uzunligi 85 metrni, kengligi esa 14 metrni tashkil qiladigan kema haybati bilan kishini lol qoldiradi. U 17 nafar mehmonga mo‘ljallangan oltita bo‘lmani o‘z ichiga oladi. Tashrif buyurganlar yuqoriga ko‘tarilish uchun liftdan foydalansa ham bo‘ladi. Burun qismida hovuzi bor kemaning ichkarisidagi mehmonxonada royal, massaj kabinasi, jakuzi, kinoteatr hamda okean fonida kun botishini tomosha qilish imkonini beruvchi zal mujassam. Bunday o‘ziga xos hordiq chiqarish 130 million dollar turadi.

Ijodkor tug‘ilgan kuniga Ben Afflekdan tashqari, yana kimlarni taklif qilgani noma’lum. Jennifer Instagram sahifasida Ben bilan tushgan suratini joylaganidan keyin muxlislar juftlikning takror birga ekanidan xabar topgan. “Benniferlar qaytdi”, “Hech qachon 52 yoshingdagi singari yaxshiroq ko‘rinmagansan. Sizlarning takror birga ekanligingizni ko‘rish naqadar yaxshi”, — deb izoh qoldirgan foydalanuvchilar.

Eslatib o‘tamiz, juftlik 2021-yilning boshida munosabatlarini qayta tiklagan. Avvaliga do‘stona yozishgan mashhurlarning shaxsiy hayoti bilan bog‘liq muammo kuzatilganda bir-birini qo‘llab-quvvatlaganiga shubha yo‘q. Ben Ana de Armas, Lopes esa Aleks Rodriges bilan munosabatlariga nuqta qo‘ygan. Keyinroq esa Lopesning sobiq qaylig‘i bilan uchrashayotgani haqida mish-mishlar tarqalgan.