Toshkent viloyati Bekobod shahrida yashovchi aka-ukalar o‘z xonadonlarida jami 25 nafar voyaga yetmagan bolaga noqonuniy tarzda diniy saboq berayotgani aniqlandi. Bu haqda O‘zA xabar berdi.
Ma’lum bo‘lishicha, Bekobod tumanidagi masjidlardan birining imom-xatibi o‘z uyida har kuni 5 nafar bolani o‘qitib, ulardan oylik to‘lov sifatida 800 ming so‘mdan olgan.
Uning akasining xonadonida esa oyiga 1,5 million so‘m evaziga 20 nafar bola ham yashab, ham diniy saboq olgan. Shuningdek, mazkur shaxs saboq berish jarayonlariga 21 yoshli o‘g‘lini ham jalb qilgan.
Qayd etilishicha, ushbu bolalar 2005—2015-yillar oralig‘ida tug‘ilgan bo‘lib, ular Toshkent shahri, Sirdaryo va Jizzax viloyatlaridan kelib ta’lim olgan.
Shuningdek, bolalardan biri Bo‘ka tumanidagi umumiy o‘rta-ta’lim maktabi direktorining o‘g‘li bo‘lib, u 2020/21-o‘quv yilida maktabdagi darslarga umuman qatnamagan.
Imom-xatibning akasi saboq berish jarayonida vazifalarni o‘zlashtirmagan bolalarni kaltaklab, ularni och qoldirish bilan jazolagan.
Ta’kidlanishicha, psixolog tomonidan bolalar bilan o‘tkazilgan suhbatda ularning ko‘pchiligi ota-onalarining xohish-istaklari bilan o‘qishga kelganini ma’lum qilgan.
Ushbu shaxslarga nisbatan Ma’muriy javobgarlik to‘g‘risidagi kodeksning tegishli moddalariga ko‘ra, bazaviy hisoblash miqdorining 7—8 baravari (1 million 715 ming — 1 million 960 ming so‘m) miqdorida jarima solindi. Shuningdek, imom-xatibning akasiga 10 sutka ma’muriy qamoq jazosi ham tayinlandi.
Bundan avval Samarqand viloyati IIB masjidlarning birida voyaga yetmagan bola so‘roq qilingani tasvirlangan videoga izoh bergani, Gulistonda maktab o‘quvchilariga noqonuniy diniy ta’limdan dars berib kelgan ayollar aniqlangani hamda Toshkentda bolalarga noqonuniy diniy ta’lim berib, ularni kaltaklagan shaxs qo‘lga olingani haqida xabar berilgandi.
Izoh (0)