Londonda 25-iyul kuni boshlangan kuchli yomg‘ir tufayli ko‘chalarni, yerosti yo‘llari va metro stansiyalarini suv bosdi. Yog‘ingarchilik oqibatida sakkizta metro va bitta yerusti temiryo‘l liniyasining stansiyasi yopilgan.

Foto: Getty Images

BBC News kanalining xabar berishicha, qutqaruv xizmatlariga bir necha soat ichida uch yuzga yaqin murojaat kelib tushgan, ularning aksariyati yo‘llarning va uylarning suv bosishi haqida.

“Londonda Kvenstaun-roud bo‘ylab harakatlanayotgan ikki qavatli avtobus temiryo‘l ko‘prigining ostiga tiqilib qolgan, avtobus saloniga suv kira boshlagan”, — deb xabar bermoqda AFP muxbiri avtobus haydovchisiga asoslanib. Yo‘lovchilar avtobusni tark etishga majbur bo‘lgan, yo‘l yopilgan.

Foto: BBC

“Suv toshqini tufayli Londonda ko‘plab yo‘llar, jumladan, Blekuol yerosti yo‘li, A12 avtomagistrali va Shimoliy halqa magistralining bir qismi yopildi. Boshqa yo‘nalishlarda uzoq muddatli tirbandlik kuzatilmoqda”, —deb yozadi OAV.

Foto: Getty Images

London o‘t o‘chiruvchilar brigadasi poytaxt sharqidagi Saut-Vudford tumanidagi toshqinlarni tozalash uchun politsiya bilan ish olib borayotganini ma’lum qildi.

“Yog‘ingarchilik tufayli Buyuk Britaniyaning Meteorologiya xizmati kunning oxirigacha Angliya g‘arbida, janubi-g‘arbida va janubi-sharqida shuningdek, poytaxtda  xavfning sariq darajasini joriy qildi. Mahalliy vaqt bilan soat 19:00 gacha (Toshkent vaqti bilan 23:00) xavfning eng yuqori, to‘q sariq darajasi amal qilgan”, — deyiladi o‘t o‘chirish xizmati Twitter’ida.

The Independent nashrining yozishicha, Britaniyadagi toshqinlar London janubidagi Klepxem va Kambervell hududlariga eng ko‘p zarar yetkazgan.

O‘z navbatida, Blik nashri Shveysariyada ham, asosan, mamlakatning markaziy qismida kuchli yomg‘ir va momaqaldiroq yuz bergani haqida xabar qilmoqda. Suv toshqini hududlar o‘rtasidagi temiryo‘l aloqalarini uzib qo‘ygan. Mamlakatda yo‘llarni suv bosgan, ko‘plab avtomobillar qisman suv ostida qolgan. Shu bilan birga, Tsug kantoniga do‘l yog‘gan. Beshta munitsipalitetdagi ko‘chalar, yerto‘lalar va yerosti garajlari suv ostida qolgan.