O‘zbek shou-biznes vakillari orasida birinchilardan bo‘lib vaksina olgan san’atkorlar “Daryo” muxbiri Feruz Muhammadga vaksina olgandan keyingi ahvoli haqida ma’lumot berdi.

Ozodbek Nazarbekov

Foto: Telegram / Ozodbek Nazarbekov Ahmadovich

O‘zbekiston madaniyat vaziri Ozodbek Nazarbekov san’atkorlar orasida birinchilardan bo‘lib, Xalqaro press-klubning 3-iyul kuni bo‘lib o‘tgan jonli efirida koronavirusga qarshi “Sputnik V” vaksinasi bilan emlandi. Vazir 24-iyul kuni vaksinaning ikkinchi dozasini ham qabul qildi hamda to‘liq emlanganlik sertifikatiga ega bo‘ldi.

“Vaksinaning birinchi bosqichini olganimizga 20 kundan oshgan bo‘lsa, sog‘lig‘imiz bilan bog‘liq hech qanday bezovtalik holatlari yuz bermadi.

 Tibbiyotda ma’lum bo‘lishicha, inson organizmi bir-biridan farqlangani bois, vaksinatsiya jarayoni har kimda har xil kecharkan.

Shu nuqtayi nazardan hali hamon ko‘pchilik yurtdoshlarimizda hadiksirash, qo‘rquv ustunlik qilmoqda.

Xalqimizga shuni aytmoqchimanki, vaksina — virusni yengishning yagona chorasi ekan, vaqtni boy bermang. Virusga qarshi emlanib, o‘zingiz va yaqinlaringizga cheklovlarsiz, odatiy yashash tarziga qaytishiga ko‘maklashing!”, — deydi Ozodbek Nazarbekov.

“Bravo” kulgi jamoasi rezidenti Otabek Mirzaxolov

Foto: Instagram / @otabekmirzaholov

Otabek Mirzaxolov Zo‘r TV telekanalining jonli efirida vaksina oldi.

Men o‘zbek-xitoy vaksinasi bilan emlandim. Hozircha bu vaksinani birinchi dozasini qabul qildim. Allohga shukr hech qanday salbiy ta’sirini sezmadim. Lekin men bilan birga emlangan aktyor Dilshod Mirzamurodovda bir kun davomida vaksina olgan joyi og‘rib yurdi. Keyingi kun bu holat unda ham o‘tib ketdi. Hozir ikkalamizning ham sog‘ligimiz yaxshi. Xudo xohlasa har 28 kunda keyingi dozalarini qabul qilamiz.

Otabek Mirzaxolov, “Bravo” kulgu jamoasining a’zosi

O‘tkir Siddiqov

Foto: “Daryo”

Taniqli suxandon O‘tkir Siddiqov “Sputnik V” vaksinasi bilan emlandi.

“Sputnik V” vaksinasining birinchi dozasi bilan 23-iyun kuni, ikkinchi dozasi bilan 14-iyul kuni emlandim. Odamlar aytayotgan darajada vahimalarga xojat yo‘q deb o‘ylayman. Misol uchun menda hammasi joyida. Allohga shukr hech qanday yomon asoratlar yo‘q. Birmuncha holsizlik bo‘lishi mumkin, ammo bu ham qisqa muddatda o‘tib ketadi.

O‘tkir Siddiqov, O‘zbekistonda xizmat ko‘rsatgan madaniyat xodimi

Ahad Qayum

Foto: Instagram / @ahadqayum_prodyuserA

Rejissor va prodyuser Ahad Qayum o‘zbek-xitoy vaksinasini qabul qildi.

O‘zbek-xitoy vaksinasi bilan emlandim. Koronavirus balosidan qutulishning bundan boshqa chorasi bo‘lmasa kerak. Ahvolim juda yaxshi, xavotirlanishga asos yo‘q.

Ahad Qayum, rejissor, aktyor

Yulduz Usmonova va Mansur Agaliyev

Foto: Instagram / @yulduzibragimovnausmonova

Yulduz Usmonovaning turmush o‘rtog‘i “Sputnik V” vaksinasini oldi.

Yulduz Usmonova bilan birgalikda “Sputnik V” vaksinasini ikkala dozasini ham olib bo‘ldik. Birinchi dozasini iyun oyida, ikkinchi dozasini esa 2-iyul kuni olganmiz. Boshida biroz holsizlik bo‘ldi, ammo ikkalamizda ham isitma chiqmadi, ishtaha yo‘qolishi ham kuzatilmadi. Allohga shukr ikkalamizda ham hech qanday yomon asoratlari kuzatilmadi. Hozir ham sog‘ligimizdan hech qanday shikoyatimiz yo‘q.

Mansur Agaliyev, Yulduz Usmonovanining prodyuseri, turmush o‘rtog‘i

Xayrulla Sa’diyev

Foto: “Daryo”

Ataylabdan 16-iyul kuni Namangandagi syomkalarni tashlab vaksinaning ikkinchi dozasini olgani Toshkentga keldim. “Sputnik V” vaksinasini birinchi dozasini o‘tgan oyda olgandim. Xudo xohlasa, endi 17-iyul kuni kelasiz, deyishgandi. Vaksinani qabul qilganimda o‘zimda deyarli hech qanday salbiy o‘zgarishni sezmadim. Ko‘pchilik vaksina olganimdan so‘ng “issig‘im chiqib yurdim”, degan gaplarni aytishgandi. Menda unday bo‘lmadi, salgina holsizlik bo‘lganini aytmaganda, hammasi joyida.

Xayrulla Sa’diyev, O‘zbekiston xalq artisti

Asadillo Nabiyev

Foto: “Daryo”

O‘zbekistonda xizmat ko‘rsatgan artist Asadillo Nabiyev “Sputnik V” vaksinasi bilan emlangani hamda o‘zini yaxshi his etayotganini ma’lum qildi.

“Sputnik V” vaksinasining birinchi dozasi bilan 17-iyul kuni emlandim. Shifokor allergiya qo‘zg‘aydigan ovqatlarni iste’mol qilmaslikni, konditsionerli xonada uxlamaslikni, shamollashga sabab bo‘lishi mumkin bo‘lgan ishlarni qilmaslikni maslahat berdi.  Vaksina olganimga bir kun bo‘ldi. Allohga shukr o‘zimni juda yaxshi his qilmoqdaman.

Asadillo Nabiyev, O‘zbekistonda xizmat ko‘rsatgan artist, O‘zbek milliy akademik drama teatri direktori o‘rinbosari

Nigina Nabiyeva

Foto: Instagram / @nigina_nabiyeva

Oilamiz bilan AQShning Tennisi shtatida vaksina oldik. Biz vaksina Pfizer turi bilan 2020-yilning aprel oyida emlangan edik. Vaksinaning bu turi ikki marotaba, har 21 kunda qabul qilinadi. Vaksina olganimizdan keyin onamda va menda qo‘limizda biroz og‘riq paydo bo‘ldi. Menda vaksina olgan kunim biroz holsizlik bo‘ldi. Oilamizdan hech kimda boshqa hech qanday salbiy ta’siri kuzatilmadi. Ikkinchi dozasini qabul qilganimda ham hammasi joyida edi.

Nigina Nabiyeva, xonanda

Rustam Sa’diyev

Foto: Instagram / @rustam_sagdiev

Rustam Sa’diyev o‘zbek-xitoy vaksinasini oldi.

Ikki oy davomida “Baron 2” filmining suratga olish ishlari bilan Rossiya davlatida edim. Endi syomka jarayonlari O‘zbekistonda davom etadi. O‘z ixtiyorim bilan vaksina olishga qaror qildim. O‘tgan yili koronavirus yuqtirib olganman va undan tuzalishim juda qiyin kechgan. O‘zbek-xitoy vaksinasi bilan 19-iyul kuni emlandim. Vaksina olgan kunim odatdagidek o‘tdi. Ikkinchi kunida biroz holsiz bo‘ldim. Uchinchi kuni yana avvalgi holatga qaytdim. Hozir hammasi joyida.

Rustam Sa’diyev, rejissor