Shon-shuhrat qiymati: “Zorro” yulduzi Ketrin Zeta-Jons mashhurlik uchun qanday tovon to‘lagan?

Ekranlarda ko‘rinishi bilanoq “ingliz atirguli” deb atala boshlagan Ketrin Zeta-Jons nafaqat sohibjamolligi, ishga bo‘lgan layoqati va o‘zini tutishi sabab atrofdagilarning e’tiboriga sazovor bo‘la boshlagan. Harakatdan to‘xtamagan va shunga yarasha muvaffaqiyat cho‘qqisini zabt etishga erishgan aktrisaning hayoti bilan bog‘liq ma’lumotlarni e’tiboringizga havola qilamiz.

Aktrisalik qobiliyati to‘rt yoshidayoq namoyon bo‘la boshlagan qizaloq

Bolaligi, to‘g‘rirog‘i, to‘rt yoshidanoq Suoni shahridagi cherkovga kiraverishda qo‘shiq kuylagan Ketrin keyinroq mahalliy teatrdagi postanovkada rol ijro qilgan. Shuningdek, raqs bilan shug‘ullanishni kanda qilmagan. U aktrisa bo‘lishni shunchaki istab qo‘l qovushtirib o‘tirmagan, maqsadi sari shaxdam qadam tashlashdan to‘xtamagan. Maktab ma’muriyatidan 15 yoshda bitiruv imtihonlarini topshirishga ruxsat olganidan keyin Londonga jo‘nab ketgan. Poytaxtga borganidan keyin teleshouda ishtirok eta boshlagan va u yerdagi faoliyati davomida Ketringa “42-ko‘cha” myuziklida ishtirok etish taklif qilingan. Debyuti omadli chiqqanidan keyin bir necha loyihalarda suratga tushgan.

Tartib-intizom

Aktrisa erishgan muvaffaqiyatlari sirini qat’iy tartib-intizom bilan bog‘laydi. U 11 yoshidan boshlab har kuni kechasi kundaligiga ertangi kun bilan bog‘liq rejalarini yozib chiqqan. 24 soat davomida qilinishi kerak bo‘lgan ishlarni avvaldan rejalashtirgan. 24 yoshida “Mayning dilrabo g‘unchalari” filmidagi roli uchun Gollivudda e’tirof etilgan. Butun dunyoda mashhurlikka erishgan aktrisa o‘z orzusiga erishgan.

Mashhur juftlik

“Titanik”ning 1996-yilda suratga olingan versiyasi va “Zorro niqobi” filmlaridagi ijrosidan keyin esa mashhurligi tobora ortib borgan. Shundan keyin uning aktyor va prodyuser Maykl Duglas bilan ishqiy munosabatlari haqida mish-mish tarqalgan. Yetarlicha tanilib ulgurgan, maftunkor aktrisaning yoshi katta odamga ko‘ngil qo‘ygani ko‘pchilikni hayron qoldirgan. Turli gap so‘zlarga qaramasdan juftlik turmush qurgan va bir-biri bilan baxtli ekanini ommadan yashirmagan. Yulduzga aylanib ulgurgan aktrisaga rollari uchun millionlab gonorar to‘langan, o‘zi ishlashni istagan loyihalarni xohishiga qarab tanlaydigan darajaga yetgan. 2002-yilda “Chikago” myuziklidagi ijrosi tufayli “Oskar” mukofotiga loyiq deb topilganida ikkinchi farzandiga homilador bo‘lgan.

Qamoq, saraton va depressiya

Juftlikning baxt va quvonchlarga to‘la hayoti 10 yilgina davom etgan xolos. Shundan keyin qora kunlar boshlangan. Dastlab Duglasning birinchi turmushidan bo‘lgan farzandi — Kemeron narkotik moddalar savdosida ayblanib qamoqqa olingan. Shu 2010-yilning o‘zida Mayklga hiqildoq saratoni tashxisi qo‘yilgan. Bu vaqtda Ketrin turmush o‘rog‘ini bir daqiqa ham yolg‘iz qoldirmagan, kimyoterapiyadan keyin lohas bo‘lib qolgan Duglasni parvarish qilgan. Oradan bir yil o‘tib juftlik xushxabar: kasallik yengilgani, Maykl suratga tushishga hozir ekanini ma’lum qilgan. Hammasi iziga tushgandek tuyilgan bir vaqtda Ketrinning salomatligida muammo kuzatila boshlagan. So‘nggi yillardagi zo‘riqishlar jiddiy psixologik kasallik kelib chiqishiga sabab bo‘lgan. Depressiya xurujlari bezovta qilgan aktrisaning ahvoli shunchalik yomonlashganidan ruhiy klinikaga yotishiga to‘g‘ri kelgan. O‘ziga bo‘lgan ishonchi yo‘qolgan va o‘zini kuchsiz his qilgan Ketrin aktrisalik karyerasiga nuqta qo‘yish haqida ham o‘ylab ko‘rgan hatto. Avvaliga qo‘llab-quvvatlagan umr yo‘ldoshi 2013-yilda u bilan ajrashishga qaror qilgan. Duglas rafiqasining doimiy depressiyada ekanidan charchaganini aytgan.

Ajrashish fikrining o‘zgarishi va hayotga qaytish

Bir necha oydan keyin juftlikning ayrilmasdan hammasini boshidan boshlab ko‘rmoqchiligi haqidagi qarori muxlislarni hayratda qoldirgan. Tabiiyki, bu oson bo‘lmagan. Ketrinning o‘zini yaxshi his qila boshlashiga sevimli ishi sababchi bo‘lgan. “Kokainning cho‘qintirgan onasi” filmida mashhur narkobaron xonim Grizelda Blankoni gavdalantirganidan keyin aktrisa o‘zini yana kerakli his qilgan va hayotga bo‘lgan qiziqishi ortgan.

“O‘zini o‘zi xo‘rlash kerakmasligi hayotning eng asosiy darsi. Men hamisha taqdir zarbalarini tavoze bilan qabul qilish va o‘z muvaffaqiyatlarimdan xijolat bo‘lishga uringanman. Ammo kamtar bo‘lish hamda boyligim, mashhurligim, go‘zalligim, yulduzning rafiqasi ekanim hamda turmush o‘rtog‘imning oilasi ancha vaqtdan buyon Gollivudda obro‘li ekani sabab o‘zimni oqlash jonimga tegdi. Men oilamni, erim, ajoyib farzandlarim va o‘z ishimni yaxshi ko‘raman. Quvonchli va baxtli lahzalar hali oldinda deb, umid qilaman. Turmush o‘rtog‘im u haqida cheksiz jirkanch g‘iybatlar tarqalganiga qaramay, baxtli va salomat. Men o‘zimdagi barcha farovonliklarga munosibman”, — degan u 2017-yilda jurnalistlarga bergan intervyusida.

Ispaniyada quyosh botishi

https://www.instagram.com/p/CP84NTIHA60/

Hayot sinovlarini, yaxshi va yomon kunlarni boshdan kechirgan juftlik hali-hamon birga. Yillar o‘tgani sayin munosabatlari mustahkamlanib, bir-birini yanada yaxshi tushunishni o‘rgangan mashhurlarning ikki nafar farzandi allaqachon voyaga yetgan va karyerasini boshlab ulgurgan. Yoshi ellikdan oshgan aktrisa vaqtini oilasi bilan Ispaniyadagi uyida o‘tkazishga harakat qiladi. So‘nggi vaqtlarda kamdan kam hollarda suratga tushishi va intervyu berishni jini unchalik suymasligiga qaramay, u quyosh botishini suratga olishni kanda qilmaydi. Har bir yangi kun botishi va tong otishini takrorlanmas yangi imkon deb bilsa ne ajab.