AQShda yovvoyi g‘oz operatsiyaga olib ketilgan juftini qidirib topdi. Qush shifokorlar ishini diqqat bilan kuzatib turgan

Massachusets shtatida yovvoyi hayvonlarni qutqarish markazi bor, markaz yonida esa Arnold laqabli Kanada go‘zi va uning jufti yashaydigan ko‘l mavjud. Qushlar uzoq yillardan buyon birga yashab keladi, deb yozadi Meduza.

Odatda yovvoyi g‘ozlar odamlardan masofa saqlagan holda yashaydi. Ammo yaqinda markaz xodimlari Arnold oqsashni boshlaganini va to‘g‘ri joyda ham yiqilib tushayotganini payqab qolgan. Qo‘shnilar bundan xavotirga tushgan. Qushni ushlab, markaz huzuridagi veterinariya klinikasiga olib borishgan. Arnoldning panjasida jiddiy jarohat aniqlangan. Aftidan, u suzish vaqtida toshbaqaga ilinib qolgan. Jabrlangan yovvoyi g‘ozga antibiotiklar berilib, ertasi kuniga operatsiya tayinlangan.

Shifokorlar Arnoldni operatsiyaga tayyorlayotgan vaqtda klinika eshigini kimdir taqillata boshlagan. Bu g‘ozning jufti bo‘lib chiqqan — u qandaydir yo‘l bilan nar g‘ozni qidirib topgan va o‘zini ichkariga qo‘yishmayotganidan qattiq jahli chiqqan. Operatsiyani uning ko‘z ostida o‘tkazishga to‘g‘ri kelgan (eshiklar shaffof). Qush butun operatsiya davomida diqqat bilan shifokorlar harakatini kuzatgan va eshikdan bir qadam ham siljimagan.

Jarrohlik amaliyoti muvaffaqiyatli o‘tgan. Arnold anesteziyadan so‘ng o‘ziga kelgach, uning panjasi bog‘lab qo‘yilgan va jufti bilan uchrashishga ruxsat berilgan. Markaz xodimlarining so‘zlariga ko‘ra, qushlar bir-birini ko‘rgach, tezda tinchlangan. Ikki haftadan so‘ng, Arnold to‘liq tuzalib ketadi va ular yana ko‘lda birga yashashi mumkin.

Avvalroq britaniyalik ayol akvariumdagi sherigini yemoqchi bo‘lib, jag‘ini sindirib olgan oltin baliqni davolagani to‘g‘risida xabar berilgandi.