Bloomberg resursi muharriri Mark Gurman yangi iPhone 13 smartfonlari seriyasiga oid navbatdagi ma’lumotlar bilan bo‘lishdi, deb xabar beradi IXBT.
Foto: IXBT
Manbaning tasdiqlashicha, iPhone 13 seriyasi yangi bir kristalli Bionic A15 tizimi bilan jihozlanadi, ekran ustidagi qirqim kichrayadi va 120 gertsli yangilanish chastotasiga ega bo‘ladi. Shuningdek, u smartfonlar Apple Watch “aqlli” soatlari kabi doim yoniq ekran rejimini qo‘llab-quvvatlashini ma’lum qilgan.
Foydalanuvchilar iPhone X chiqqanidan buyon iOS’da qachon Always-On rejimi paydo bo‘lishini kutmoqda. Biroq Apple ushbu funksiyaga e’tibor bermay kelayotgan edi. Agar Mark Gurmanning aytganlar to‘g‘ri bo‘lib chiqsa, iPhone 13 foydalanuvchilari smartfonni faollashtirmasdan turib vaqt, o‘tkazib yuborilgan qo‘ng‘iroq va xabarlar, shuningdek, ob-havo ma’lumotlaridan xabardor bo‘la oladi.
Yetkazib berish zanjiridagi manbalar 2020-yildayoq iPhone 13 doimo yoniq bo‘ladigan displeyga ega bo‘lishini ta’kidlagandi. Ammo Apple tomonidan hozirga qadar bu borada rasmiy ma’lumot berilmadi. Umuman olganda, kompaniya bu kabi ma’lumotni rasmiy taqdimotgacha baribir e’lon qilmaydi.
2021-yilda iPhone 13 anonsi 14-sentabrida bo‘lib o‘tishi mumkin. Dastlabki buyurtmalar 17-sentabrdan qabul qilinadi, savdolar 24-sentabrdan boshlanadi.
Avvalroq Gurman iPhone 13 lineykasi barmoq izi skaneriga ega bo‘lmasligini ma’lum qilgandi.
