Buxoroda alimentdan qarzdor otalardan farzandlarining kelgusi besh yillik ta’minoti uchun aliment pullari undirildi. Bu haqda “Daryo”ga MIB viloyat boshqarmasi axborot xizmati rahbari Ilhom Tursunov xabar berdi.

Ta’kidlanishicha, Buxoro tumanida yashovchi alimentdan qarzdor D.H. 2018-yildan hozirga qadar fuqaro S.F. foydasiga bir nafar voyaga yetmagan farzandi moddiy ta’minoti uchun aliment to‘lovidan bo‘yin tovlab kelgan. Byuroning Kogon tumani davlat ijrochilari tomonidan tushuntirish ishlari olib borilgan. Va natijada D.H. xotiniga voyaga yetmagan farzandi uchun 2021-yilning aprel oyidan 2026-yilning apreliga qadar bo‘lgan besh yillik aliment puli — 70 million so‘mni bira to‘la to‘lab bergan.

Xuddi, shuningdek, Jondor tumanida yashovchi qarzdor A.Sh.dan undiruvchi N.R. foydasiga ikki nafar farzandining voyaga yetguniga qadar, ya’ni 2026-yilga qadar bo‘lgan 73 million 500 ming so‘mlik aliment pullari undirilgan.

“Majburiy ijro byurosi organlarida voyaga yetmagan farzandlarning moddiy ta’minoti uchun pullarni hisoblash va to‘lash tartib-tamoyillari qat’iy e’tiborda. Farzandining voyaga yetguniga qadar bo‘lgan to‘lovini amalga oshirishdan bo‘yin tovlab, qochib yurgan otalar o‘rtasida tushuntirish ishlari olib borilmoqda. Bu o‘ziga xos ijobiy natijani ko‘rsatganini yashirishga hojat yo‘q. Besh yillik qarzdorlikni oldindan undiruv ishlari jarayonida Peshku tumanidagi ikki oila yarashdi”, — dedi Ilhom Tursunov.