Jizzax shahrida ikki fuqaroni xorij universitetiga o‘qishga kiritib qo‘yishni va’da qilgan shaxslar qo‘lga olindi, deb xabar beradi Bosh prokuratura huzuridagi Departament.
Ma’lum qilinishicha, Bosh prokuratura huzuridagi Departamentning Jizzax shahar bo‘limi hamda DXXning viloyat boshqarmasi tomonidan tezkor tadbir o‘tkazilgan. Tadbirda G.R. va J.S. ismli shaxslar oldindan til biriktirib, ikki nafar fuqaroni vakolatli tanishlari orqali 18 ming dollar evaziga xorij universitetlaridan biriga o‘qishga kiritib qo‘yishni va’da qilgan.
Xizmati evaziga ular kelishilgan pulning 5,8 ming dollarini firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda o‘qishga kiritib qo‘yish uchun fuqarodan 4 ming dollar olgan universitet o‘qituvchisi va uning sherigi ushlangani, Navoiy davlat pedagogika institutiga o‘qishga kiritib qo‘yishni va’da qilib, fuqarodan 2 ming dollar olgan shaxs qo‘lga olingani to‘g‘risida xabar berilgandi.
Izoh (0)