Eyfel minorasiga faqat emlanganlar kiritiladi, JSST koronavirus Xitoydagi laboratoriyada paydo bo‘lganini istisno qilmadi. Koronaxabarlar

Jons Hopkins universiteti ma’lumotlariga ko‘ra, dunyoda koronavirusga chalinganlar soni 188 925 223 kishiga yetdi, shularning 4 066 561 nafari vafot etgan. Kasallanganlar soni bo‘yicha doimgidek, AQSh (33,9 million), Hindiston (31 million), Braziliya (19,2 million), Fransiya (5,8 million) va Rossiya (5,8 million) yetakchilik qilmoqda.

Parijdagi Eyfel minorasi bugun, 16-iyuldan tashrif buyuruvchilar uchun ochiladi.

“Biz keksa xonimni nazokat va g‘amxo‘rlik bilan uyg‘otishga tayyorlanyapmiz, u o‘z-o‘zini yakkalash rejimi tufayli 250 kun uyquda bo‘ldi”, — deya minoraning ochilishini izohladi unga operatorlik qiluvchi kompaniya rahbari Jan-Fransua Martin.

20-iyulga qadar Eyfel minorasi barcha uchun ochiq bo‘ladi, ammo 21-iyuldan boshlab koronavirusga qarshi emlanmagan fuqarolar kiritilmaydi. Martinning so‘zlariga ko‘ra, yaqin orada Fransiyadagi barcha sayyohlik nuqtalarida shunday qoida amal qilishni boshlaydi.

So‘nggi uch hafta mobaynida minora rahbariyati liftlarni yo‘lovchisiz ishlatib ko‘rib, xavfsizlikni tekshirdi. Eyfeldagi ishlarni qayta tiklash uchun avvalroq majburiy ta’tilga chiqarib yuborilgan 350 kishi ishga qaytarildi.

COVID-19 Xitoyning Uxan shahridagi laboratoriyada paydo bo‘lgan va sizib chiqishi tufayli tarqalib ketgan, degan versiyani istisno qilishga hali erta. Bu haqda Jahon sog‘liqni saqlash tashkiloti (JSST) rahbari Tedros Adanom Gebreyesus ma’lum qildi.

“Mening o‘zim laborant bo‘lganman, men immunologman, laboratoriyada ishlab ko‘rganman va laboratoriyalarda kutilmagan hodisalar bo‘lishidan xabarim bor. Shunday bo‘lib turadi”, — deya aniqlik kiritdi JSST rahbari.

Gebreyesus qayd etishicha, pandemiya qandaydir tarzda laboratoriyalar bilan bog‘liq yoki bog‘liq emasligini tushunish uchun bo‘lib o‘tgan hodisani tekshirish juda muhim. “Bizga ushbu laboratoriyadagi vaziyat pandemiyagacha va pandemiya boshida qanday bo‘lgani haqidagi ma’lumot, to‘g‘ridan to‘g‘ri axborot kerak”, — dedi u va Xitoyning hamkorlikka tayyorligi bu yerda hal qiluvchi rol o‘ynashini aytdi. “Agar biz to‘liq ma’lumot olsak, laboratoriya bilan bog‘liq versiyani istisno qilishimiz mumkin”, — dedi JSST rahbari. Shuningdek, u Xitoyni ochiq va shaffof hamkorlikka chaqirdi, “ayniqsa, biz pandemiyaning ilk kunlarida so‘ragan dastlabki ma’lumotlar borasida”, dedi u.

Birlashgan Arab Amirliklari (BAA)ning Abu-Dabi amirligi hukumati koronavirus tarqalishi xavfining oldini olishga qaratilgan yangi choralar haqida e’lon qildi, ular 19-iyul, dushanba kunidan amal qilishni boshlaydi.

Abu-Dabiga so‘nggi 48 soat ichida topshirilgan manfiy natijali PZR-test yoki bir kun ichida olingan ekspress PZR-test bilan kirish mumkin. Bu ham chet elliklar, ham amirlik rezidentlari uchun amal qiladi.

Amirlikda muayyan vaqt davomida qolish istagida bo‘lganlar COVID-19’ga nisbatan testlardan takroran o‘tadi.

Dushanbadan Abu-Dabi hududida 00:00 dan 05:00 gacha komendantlik soati joriy qilinadi, bu vaqtda ko‘chalarda transport harakati to‘xtatiladi.

Savdo markazlari, kinoteatrlar, plyajlar va umumiy ovqatlanish muassasalariga tashrif buyuruvchilar soniga cheklovlar kiritilmoqda.