Farg‘ona viloyatida Jinoyat ishlari bo‘yicha Farg‘ona tumani sudi qarori bilan yetti yil davomida farzandining moddiy ta’minotidan bo‘yin tovlab yurgan fuqaro 15 sutkaga qamaldi. Bu haqda “Daryo”ga MIB viloyat boshqarmasi xabar berdi.
Ma’lum bo‘lishicha, Jinoyat ishlari bo‘yicha Farg‘ona tumani sudining 2014-yil 1-iyuldagi qaroriga ko‘ra, Sh.A. turmush o‘rtog‘i M.A. foydasiga bir nafar voyaga yetmagan farzandining moddiy ta’minoti uchun har oylik ish haqi va boshqa daromadlarining uchdan bir qismidan kam bo‘lmagan miqdorda aliment to‘lashi lozimligi belgilangan.Biroq Sh.A. aliment to‘lashdan bosh tortib yurgani sabab ayni kunga qadar uning mavjud qarzdorligi 43 million 800 ming so‘mga yetgan.
MIB Farg‘ona tuman bo‘limi tomonidan fuqaro Sh.A. bir necha marotaba o‘z vaqtida farzandi moddiy ta’minotini bajarishi yuzasidan ogohlantirilgan. Biroq Sh.A. turli bahonalar bilan aliment to‘lamasdan, yashirinib yurgan.
Qidiruv inspektorlari tomonidan olib borilgan tadbirlar natijasida qarzdor ota 2021-yilning 12-iyul kuni ushlangan. Sh.A.dan aliment qarzdorligini undirish imkoni bo‘lmagani sababli unga nisbatan to‘plangan hujjatlar Ma’muriy javobgarlik to‘g‘risidagi kodeksga asosan, Jinoyat ishlari bo‘yicha Farg‘ona tumani sudiga yuborilgan.
Sud qarori bilan qarzdor otaga nisbatan 15 sutka ma’muriy qamoq jazosi tayinlangan.
Eslatib o‘tamiz, avvalroq Farg‘onada otasiga aliment to‘lamagan o‘g‘ilga jinoyat ishi qo‘zg‘atilgani, Qashqadaryoda esa ota farzandlarining ta’minoti uchun 100 million so‘m pulni oldindan to‘lab bergani haqida xabar berilgandi.
Izoh (0)