Namanganda suv talashgan fuqarolarning janjali o‘lim bilan yakunlandi, deb xabar beradi viloyat IIB axborot xizmati.

Ma’lum qilinishicha, 6-iyul kuni soat 21:00 larda Davlatobod tumanida yashovchi 56 yoshli N.O. MChJga qarashli mevali bog‘da shu yerda dehqonchilik bilan shug‘ullangan, To‘raqo‘rg‘on tumanida yashagan 63 yoshli M.N. bilan suv talashib o‘zaro janjallashgan.

Janjal oqibatida N.O. qo‘li bilan M.N.ning bosh qismiga urgan va u yerga boshi bilan yiqilib, tan jarohati olgan. Shundan so‘ng, N.O. fuqaro M.N.ni To‘raqo‘rg‘on tuman tibbiyot birlashmasiga olib borgan.

Jabrlanuvchi olgan tan jarohati bo‘yicha To‘raqo‘rg‘on tuman markaziy shifoxonasiga yotqizilib, ko‘rsatilgan tibbiy yordamga qaramasdan 10-iyul kuni vafot etgan.

Sud-tibbiy ekspertizasi ma’lumotiga ko‘ra, marhumning badanida tashqi tan jarohatlari mavjud emas, uning o‘limi bosh miya yopiq shikasti, bosh miya to‘qima ostiga qon quyilishidan kelib chiqqan.

Mazkur holat bo‘yicha Namangan shahar Davlatobod tumani IIB tomonidan Jinoyat kodeksining 104-moddasi (qasddan badanga og‘ir shikast yetkazish) 3-qismi bilan jinoyat ishi qo‘zg‘atilgan.

Avvalroq Farg‘onada suv talashib, tanishini toshbo‘ron qilgan shaxslarga nisbatan jinoiy ish ochilgani, Bo‘kada mol boqish uchun yaylov talashgan erkak hamqishlog‘ining qorniga o‘roq sanchib olgani to‘g‘risida xabar berilgandi.