Koronavirus sabab ahvoli og‘irlashgan rossiyalik xonanda MakSimni komadan chiqarib bo‘lmayapti

Koronavirus sabab shifoxonaga yotqizilgan xonanda MakSimni shifokorlar komadan chiqarishga urinib ko‘rdi.

MakSim taxallusi bilan ijod qiladigan Marina Maksimovaning salomatligi bilan bog‘liq turli mish-mishlar tarqalmoqda. Xonandaning piar-direktori uning ahvoli yaxshilanayotganini ta’kidlayotgan bir vaqtda, do‘stlari buni inkor qilmoqda.

Shifokorlar u ulangan EKMO — ekstrakorporal membranali oksigenatsiya apparati (yurak va o‘pkalar o‘z faoliyatini bajara olmaydigan darajada xasta bo‘lsa, bemorning hayoti va organizmini vaqtincha qo‘llab-quvvatlash maqsadida amalga oshiriladigan maxsus davolash usuli)ni o‘chirishga harakat qilgan, ammo bu ish bermagan. Mustaqil ravishda nafas ololmagan Marinani qayta apparatga ulashga majbur bo‘lishgan. O‘pkalari shu darajada ko‘p (80 foiz) zararlanganidan xonanda mustaqil nafas olishga kuchi yetmagan. MakSim yotgan shifoxonada ishlaydigan insayderning aytishicha, xonanda ayni vaqtda sopor (chuqur uyqu, subkoma: bunda bemorni faqatgina tashqi ta’sirlar bilan uyg‘otish mumkin bo‘ladi) holatida.

Ayni vaqtda ahvoli og‘ir bo‘lishiga qaramay, xonandaning yaqin do‘stlari va muxlislari uning tuzalib ketishidan umidini uzmagan.

Eslatib o‘tamiz, 2021-yilning 15-iyun kuni shifoxonaga yotqizilgan Marinaning ahvoli yomonlashgani tufayli unga sun’iy nafas olish apparati ulangan. Keyinroq, yana bir og‘ir kasallik aniqlangan ijodkorning ahvoli yomonlashi sababi nima bilan bog‘liq ekani haqida xabar berilgan.