Bir oy davom etgan Yevro—2020 musobaqasining final o‘yini 11-iyul, yakshanba kuni bo‘lib o‘tadi.

Musobaqa yo‘li

Avvaliga Italiyadan bu qadar yuqori natija kutilmagandi. “Skuadra azzura” guruhdan bemalol chiqishi, lekin pley-offda musobaqani tark etishi taxmin qilingandi. Italiya esa hammani hayron qoldira boshladi. Guruhda 100 foizlik natija bilan birinchi o‘rinni egalladi. Finalga qadar qoqilmasdan yetib keldi.

Angliyaning esa guruhdan chiqishiyoq tomoshabop futbol muxlislarini hayron qoldirdi. Muxlislar futbolni maftunkor o‘yin sifatida intriga uchun tomosha qiladi. Angliya esa Yevro—2020 da antifutbol ko‘rsatdi, kamiga yarim finalda muxlislarda kattagina simpatiya uyg‘otgan Daniyani shubhali penalti evaziga mag‘lub etdi.

Italiya

Marko Verratti, Nikolo Barella, Mateo Pessina, Manuel Lokatelli, Jorjinyo, Brian Kristante kabi futbolchilardan faqat uchtasi maydonga tushadi. Roberto Manchini qiyin tanlov orasida qolgan. Raqiblarning yarim himoyasida esa ikki jangchi bor — Kalvin Fillips va Deklan Rays. Lekin italiyaliklar hujumlarining 25 foizini markazdan boshlagan bo‘lsa, qolgan barcha hujumlari qanotlardan amalga oshirilgan.

Hozircha Shveysariyadan boshqa birorta jamoa Angliyaning markaziy yarim himoyachilarini pressingda yenga olmadi. “Bankirlar” o‘shanda ikkinchi raqamda harakat qilgandi. Lekin italiyaliklardan buni kutish mushkul. Italiya ikkinchi raqamda o‘ynasa, nafaqat natijaga erisha olmaydi, balki butun boshli finalni “o‘ldirishi” mumkin.

Angliya

Angliyaning musobaqadagi yurishini yodga oladigan bo‘lsak, final ularning o‘zi uchun ham kutilmagan bo‘ldi.

Qanday bo‘lmasin Angliya terma jamoasi o‘yinlarni nazorat qila oldi. Kerak vaqtda kuchni tejadi, kerak vaqtda hujumkor o‘yin namoyish qildi. Garet Sautgeytni musobaqa tugamasdan turib eng yaxshi murabbiy deb e’lon qilsa ham bo‘ladi. U natijaga erishish uchun turli uslublardan foydalana oldi.

Yevrodagi 6 o‘yinning faqat bittasini Angliya terma jamoasi “Uembli”dan tashqarida o‘tkazdi. Bunday omad boshqa birorta jamoaga nasib etmadi. Final ham o‘sha stadionda bo‘lib o‘tadi.

Murabbiylar fikri:

Biz oson bo‘lmagan yo‘lni bosib o‘tdik. Ta’tilga chiqish uchun yana bir qadam qoldi. Angliya nafaqat yarim himoyada, balki boshqa pozitsiyalarda ham kuchli. Ular finalga o‘z-o‘zidan chiqib qolmadi. Finalda doim kuchli jamoalar o‘ynaydi. Muxlislarga to‘la stadionda ajoyib o‘yin guvohi bo‘lamiz.Roberto Manchini, Italiya terma jamoasi bosh murabbiyi

Italiya oxirgi yillarda ajoyib futbol namoyish etyapti. Biz ularning o‘yinini kuzatdik. Ularga gol urish doim qiyin bo‘lgan. Italiya finalga loyiq edi: finalga qadar Belgiya va Ispaniya kabi yuqori darajadagi jamoalarni mag‘lub etdi. Oldinda bizni katta sinov kutib turibdi.

Garet Sautgeyt, Angliya terma jamoasi bosh murabbiyi