O‘zbekistonning shimoliy hududlariga 8-iyul kuni Kavkazdan antisiklon ta’siri ostida salqin havo oqimlari kirib keldi. Natijada havo haroratining biroz pasayganligi kuzatildi, deb xabar bermoqda “O‘zgidromet”.

Foto: “Daryo” / Madina Nurman

Qayd etilishicha, 9-iyul kuni bu jarayon Respublikaning markaziy hududlariga ham o‘z ta’sirini ko‘rsatadi. Ko‘pchilik viloyatlarda quruq va kam bulutli ob-havo kuzatiladi, faqat Ustyurtda kunning ikkinchi yarmida, Toshkent viloyatida kechga tomon qisqa muddatli yomg‘ir yog‘ishi, momaqaldiroq bo‘lishi ehtimoli bor.

Havo harorati 35-40 daraja, ba’zi joylarda 42 darajagacha, Surxondaryo viloyatida 44-46 daraja, shimolda 28-33 daraja issiqni tashkil etadi.

Mamlakatdan salqin havo frontlari o‘tishi oqibatida ba’zi joylarda shamolning tezligi 15-20 metr/sekundgacha kuchayishi mumkin. 9—10-iyul kunlari changli bo‘ron bilan birga 25-30 metr/sekundgacha kuchayishi kutilmoqda.

Dam olish kunlarida nisbatan salqin havo oqimlari Respublikaning barcha hududlarini butunlay qamrab oladi, havo harorati kechalari 20-25 daraja, kunduz kunlari 32-37 daraja, janubda ba’zi joylarda 39 daragacha atrofida bo‘ladi.

Respublikaning tog‘oldi va tog‘li hududlarida momaqaldiroq bilan qisqa muddatli yomg‘ir yog‘ishi ehtimoli bor.