Dunyo va o‘zbek sportiga oid 8-iyul kunining muhim xabarlari dayjesti bilan tanishing.
O‘zbekiston
Futbol bo‘yicha O‘zbekiston U-17 ayollar terma jamoasi CAFA U-17 Women’s Championship 2021 musobaqasi g‘olibiga aylandi. So‘nggi turda o‘zbekistonlik qizlar Afg‘onistonga qarshi bahs olib bordi va 8:0 hisobidagi g‘alabani qo‘lga kiritdi. Shu tariqa O‘zbekiston guruhda 7 ochko to‘plagan holda musobaqa g‘olibiga aylandi.
O‘FA legioner futbolchilar bilan muammoga duch kelgan qator klublarga yozgi transfer oynasida cheklov va taqiqlar qo‘ydi. “Surxon”, “Neftchi” va “Sho‘rtan” futbol klublariga 2021-yilgi yozgi transfer oynasida legioner futbolchilarni ro‘yxatdan o‘tkazish bo‘yicha to‘liq cheklov joriy etildi.
“Andijon”, “Nasaf”, “Turon”, “Qizilqum”, “Qo‘qon-1912”, “Lokomotiv”, “Mash’al”, “Metallurg”, “So‘g‘diyona”, “Navbahor”, “Bunyodkor”, “Buxoro”, “Oqtepa”, “Yangiyer”, “Xorazm”, “Dinamo” futbol klublariga esa mavjud qarzdorlikni belgilangan muddatda bartaraf etmagani uchun 2021-yilning yozgi transfer oynasi uchun legioner futbolchilarni ro‘yxatdan o‘tkazish bo‘yicha taqiq qo‘yildi. Mavjud qarzdorlikni yozgi transfer davomida to‘liq bartaraf etgan klublar uchun 31-iyul sanasiga qadar yangi futbolchilarni ro‘yxatdan o‘tkazishga ruxsat etilishi belgilandi.
Jahon
Yevro—2020 ning ikkinchi yarim final bahslari bo‘lib o‘tdi. Angliya terma jamoasi qo‘shimcha bo‘limlardagi gol evaziga Daniyani mag‘lub etib, ikkinchi finalchiga aylandi. Italiya va Angliya o‘rtasidagi final bahsi Toshkent vaqti bilan 11-iyul tunida bo‘lib o‘tadi.
Angliya o‘z tarixida ilk bor Yevropa chempionati finaliga chiqdi. Shuningdek, jamoa 55 yil deganda birinchi marta yirik musobaqa finalida o‘ynaydi. Angliya Yevropa chempionati finalida o‘ynaydigan 13-jamoa bo‘ladi.
Qo‘shimcha bo‘limlarda bosh hakam Danni Makelli tomonidan Daniya darvozasi tomon belgilangan penalti ko‘plab e’tirozlar keltirib chiqardi. Sterling yiqilgan vaziyat shubhali bo‘lishidan tashqari, o‘sha hujum vaqtida maydonda ikkinchi to‘pning bo‘lgani holatning keng muhokama qilinishiga sabab bo‘lmoqda. Bundan tashqari Harri Keyn penalti ijro etayotgan vaqtda daniyaliklar darvozaboni Kasper Shmeyxelning yuziga lazer nuri tushirilgan. UEFA bu holat yuzasidan tartib-intizom ishi ochdi.
Aytgancha, Italiya va Angliya o‘rtasidagi final uchrashuvini ham niderlandiyalik hakamlar guruhi boshqarib boradi. Hal qiluvchi o‘yin Byorn Kuypersga ishonib topshirilgan. Angliya — Daniya o‘yinida videotakrorlarga javobgar bo‘lgan Pol van Bukel esa finalda VAR tizimida ikkinchi assistent bo‘lib ishlaydi.
Italiya prezidenti Yevro—2020 finaliga tashrif buyuradi. Italiya prezidenti Serjo Mattarella “Uembli”da o‘tadigan Italiya va Angliya o‘rtasidagi Yevro—2020 finaliga boradi, deya xabar qilmoqda Sky Sport Italia. Qayd etilishicha, Italiya rahbarlarining yirik musobaqalar finaliga tashrifi terma jamoaga omad keltirgan. Italiya terma jamoasi g‘oliblikni qo‘lga kiritgan JCh—1982 va JCh—2006 finallarida davlat rahbarlari o‘yinni stadiondan kuzatgan.
Stanislav Cherchesov iste’foga chiqarildi. Rossiya futbol ittifoqi (RFS) mamlakat milliy terma jamoasi ustozi bilan amaldagi shartnoma bekor qilinganini ma’lum qildi. Cherchesov 2016-yilda Rossiya terma jamoasini qabul qilib olgandi. Uning qo‘l ostidagi jamoa JCh—2018 da chorak finalga qadar yetib bordi. Yevro—2020 da esa ruslar Belgiya, Daniya va Finlyandiyadan keyin so‘nggi o‘rinni egallab, guruhda qolib ketdi. Ayrim xabarlarga ko‘ra, RFS Cherchesovga 300 million rubl miqdorida kompensatsiya to‘laydi. Boshqa xabarlarda mutaxassis kompensatsiyadan voz kechgani aytilmoqda.
Fransiya terma jamoasi esa Didye Deshamga ishonishda davom etadi. Fransiya futbol federatsiyasi prezidenti Noel Le Gre jamoa bosh murabbiyi JCh—2022 yakuniga qadar qolishini ma’lum qildi. Avvalroq jamoa Yevro—2020 nimchorak finalida Shveysariyaga yengilib, musobaqani tark etgandi. Shundan so‘ng Didye Desham Fransiya terma jamoasidan ketishi va uning o‘rini Zinedin Zidan egallashi haqida xabarlar yangragandi.
Transfer yangiliklari
“PSJ” Serxio Ramosni o‘z safiga qo‘shib oldi. Parijliklar Ramos transferini e’lon qildi. Futbolchi yangi jamoasida o‘zi uchun sevimli bo‘lgan 4-raqamni oldi. Avvalroq Parij klubi Jorjinyo Veynaldum, Ashraf Hakimi kabi futbolchilar bilan shartnoma imzolagandi. Shuningdek, jamoa Yevro—2020 finalidan keyin Janluiji Donnarumma transferini e’lon qiladi. Ayrim xabarlarga ko‘ra, “PSJ” Krishtianu Ronaldu transferi ustida ishlamoqda.
Madridning “Atletiko” klubi jamoa bosh murabbiyi Diyego Simeone bilan amaldagi shartnomani 2024-yilning yoziga qadar uzaytirdi. Uning qo‘l ostidagi jamoa 2020/21-yilgi mavsumda La Liga g‘olibligini qo‘lga kiritgandi.
Izoh (0)