Toshkent shahrida 34 bosh noyob turdagi sudralib yuruvchi hayvonlarni xorijga olib chiqib ketmoqchi bo‘lgan shaxs aniqlandi, deya xabar bermoqda Davlat bojxona xizmati.
O‘zbekistonning “Hayvonot dunyosini muhofaza qilish va undan foydalanish to‘g‘risida”gi qonuniga binoan, yovvoyi hayvonlarni va ularning qismlarini mamlakatdan olib chiqish ekologiya va atrof muhitni muhofaza qilish organlari beradigan ruxsatnomalar asosida amalga oshiriladi. G‘ayriqonuniy ravishda olib chiqishga urinish chog‘ida ushlab qolingan yovvoyi hayvonlar va ularning qismlari belgilanadigan tartibda olib qo‘yiladi.
“Toshkent-Aero” ixtisoslashtirilgan bojxona kompleksining Toshkent xalqaro aeroporti chegara bojxona posti xodimlari yo‘q bo‘lib ketayotgan kamyob turlar sirasiga kiruvchi sudralib yuruvchi hayvonlarni havo yo‘llari orqali yashirincha olib chiqilishiga chek qo‘yishdi.
Toshkent—Moskva reysi bo‘yicha parvozga shaylangan fuqarolardan biri bojxonadan yashil yo‘lak orqali harakatlanar ekan, uning bezovtalanishi bojxonachilarning diqqatini tortdi. Unga tegishli bagajlar belgilangan tartibda ko‘zdan kechirilganida esa shubhalar o‘z tasdig‘ini topdi.
Ushbu shaxs bojxona xodimlarining og‘zaki so‘rovida va yo‘lovchi bojxona deklaratsiyasida ma’lum qilmasdan turib, taqir to‘garakbosh, gekkoncha, kaltakesak kabi 35 bosh noyob jonzotlarni tirik holatda tamaki qutilari ichiga joylagancha olib chiqayotgan vaqtida to‘xtatib qolindi.
Bundan tashqari, shu kabi jonzotlarning 14 tasi spirtda qotirilgan holatda, shuningdek, 16 dona kaltakesak dumi, 1 dona ondatra dumi va 2 bosh o‘lik holatdagi chipor ilon ham olib chiqib ketilayotgani ma’lum bo‘ldi.
Mazkur sudralib yuruvchi hayvonlar, asosan, Farg‘ona vodiysida tabiatdan ajratib olingan, lekin yo‘lovchi ularni O‘zbekistondan olib chiqib ketish huquqini beruvchi hujjatlarni bojxona xodimlariga taqdim qila olmagan.
Ushbu jonzotlar O‘zbekiston ekologiya va atrof muhitni muhofaza qilish davlat qo‘mitasiga topshirildi. Holat yuzasidan esa bojxona tekshiruvlari davom ettirilmoqda.
Mavzuga doir:
- Rossiya O‘rta asrga oid madaniy boyliklarni O‘zbekistonga qaytardi
- Toshkentda bojxonachilar tomonidan mamlakatga noqonuniy ravishda olib kirilayotgan 4,3 mlrd so‘mlik mahsulotlar aniqlandi
- O‘zbekistondan 163 gr oltin quymasini og‘iz bo‘shlig‘ida noqonuniy ravishda olib chiqib ketmoqchi bo‘lgan shaxs aniqlandi