Surxondaryoda mahalla fuqarolari yig‘ini raisi o‘rinbosari un mahsulotlarini tadbirkordan aholiga sotib berish uchun olib, savdodan tushgan pullarni o‘z ehtiyojlari uchun ishlatib yubordi. Bu haqda Bosh prokuratura huzuridagi Departament matbuot xizmati xabar berdi.
Aniqlanishicha, Surxondaryo viloyati Sho‘rchi tumanidagi MFY raisi o‘rinbosari mahallaga un yetkazib beradigan ta’minotchi korxonaning ishonchiga kirib, doimiy ravishda aholiga tarqatiladigan un mahsulotini o‘zining yashash uyiga tushirgan.
Shundan so‘ng u unni aholiga sotib, 140 qop un savdosidan tushgan 18 million 900 ming so‘m pulni tadbirkorga topshirmasdan, firibgarlik yo‘li bilan o‘z ehtiyojlari uchun ishlatib yuborgani aniqlandi.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval O‘zbekistondagi ikkita OTM buxgalterlari 22,5 milliard so‘mni o‘zlashtirgani aniqlangani, Jizzaxda sayyor kassa xodimi o‘zganing pensiya va non pulini o‘zlashtirgani hamda O‘zbekiston Ekologiya qo‘mitasi va uning tarkibidagi tashkilotlar 9,4 milliard so‘mlik mablag‘ni noqonuniy sarflagani aniqlangani haqida xabar berilgandi.