Surxondaryo viloyatida daraxtlarni noqonuniy kesib tashlagan shaxs aniqlandi, deya xabar bermoqda viloyat Ekologiya va atrof-muhitni muhofaza qilish boshqarmasi axborot xizmati.

Ma’lum qilinishicha, viloyatdagi “Denov tuman yo‘llardan foydalanish” UKning uchastka bo‘limi boshlig‘i J.F. tomonidan 109 tup qimmatbaho daraxt ruxsatnomasiz kesib tashlanganligi aniqlandi.

Aniqlangan holat yuzasidan tegishli hujjatlar rasmiylashtirilib, J.F.ga nisbatan Ma’muriy javobgarlik to‘g‘risidagi kodeksning 79-moddasi 1-qismi (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) bilan BHMning 10 barobari (2 million 245 ming so‘m ) miqdorida jarima tayinlandi. Shuningdek, o‘simlik dunyosiga 329 million 157 ming 500 so‘m zarar yetkazilgani aniqlandi.

Shu bilan birga, “Denov tuman yo‘llardan foydalanish” UKga har bir kesilgan daraxt o‘rniga 100 donadan, ya’ni 10 ming 900 dona qimmatbaho daraxt ko‘chati ekish va 3 yil davomida ekilgan ko‘chatlarni parvarish qilish haqida ko‘rsatma berildi.

Hozirda jarima va o‘simlik dunyosiga yetkazilgan zararni undirish choralari ko‘rilmoqda.

Bundan avval Bekobodda hovlisi yonidagi 2 tup chinorni kesgan oila 131 million so‘m zararni to‘lashi, O‘zbekistonda daraxt ekib, parvarish qilmagan mutasaddi tashkilotlarni jarimaga tortish taklif qilingani hamda O‘zbekistonda to‘rt oy davomida 2000 dan ziyod noqonuniy daraxt kesish holatlari aniqlangani haqida xabar berilgandi.