O‘zbekistonda anomal issiq ob-havo sababli ba’zi poyezdlar harakat jadvaliga o‘zgartirish kiritilishi mumkin. Bu haqda “O‘ztemiryo‘lyo‘lovchi” AJ matbuot xizmati xabar qildi.

“O‘zgidromet” markazi ma’lumotiga ko‘ra, 2021-yil 6-iyuldan 9-iyulgacha O‘zbekistonga Eron hududlaridan quruq va issiq havo kirib kelishi davom etadi. Havo harorati kechalari 25—27 daraja iliq, kunduz kunlari 41—43 daraja issiq, shimolda, janubda va cho‘l hududlarida 44—46 darajagacha issiq bo‘ladi.

Qayd etilishicha, bunday issiq havo paytida po‘lat izlardagi harorat yanada yuqori bo‘ladi. Shu bois, harakat xavfsizligini ta’minlash maqsadida 2021-yil 9-iyul sanasiga qadar cho‘l hududlarida poyezdlar harakat jadvalida o‘zgarishlar kuzatilishi mumkin.

Bundan avval Turkmanistonda jazirama tufayli poyezd va samolyotlar harakati cheklangani, O‘zbekiston 6—8-iyul kunlari termik depressiya ta’siri ostida bo‘lishi kutilayotgani hamda O‘zbekiston hukumati anomal jaziramaga tayyorgarlik ko‘ryotgani haqida xabar berilgandi.