Qashqadaryo viloyatining Chiroqchi tumanida elektr ta’minotidan norozi bo‘lib, “Afrosiyob” poyezdi yo‘lini to‘sganlarning 9 nafariga 15 sutkadan qamoq jazosi tayinlandi, deya xabar berdi “Daryo” muxbiri.
Ma’lum bo‘lishicha, poyezd yo‘lini to‘sganlar ishini ko‘rib chiqqan Jinoyat ishlari bo‘yicha Chiroqchi tuman sudi mazkur voqeada 13 nafar kishini ayblab, ularning 9 nafariga 15 sutkadan qamoq jazosi tayinlagan bo‘lsa, 4 nafarini bazaviy hisoblash miqdorining yetti baravari — 1 million 715 ming so‘mdan jarimaga tortgan.“Bu ahvolda odamlar muammolarni ham olib chiqishga qo‘rqib qolmoqda. Bizda elektr toki masalasi katta muammo va shunday muammoligicha qolmoqda. Endi xalq jazoga tortilmaylik deb, shunday muammolar girdobida yashaveraylikmi?”, — deydi “Daryo” muxbiriga bu haqda xabar bergan aholi vakillaridan biri.
Murojaatchining aytishicha, Chiroqchining Ayritom qishlog‘ida yo‘llarning ta’mirtalabligi, elektr toki, gaz va ichimlik suv yetishmasligi kabi muammolar hamon bor.
Eslatib o‘tamiz, ijtimoiy tarmoqlarda 2021-yilning 7-iyun kuni ertalab soat 09:00 dan 10:20 larga qadar “Qarshi mintaqaviy temir yo‘l uzeli” unitar korxonasiga qarashli Ayritom temiryo‘l bekati hududida Chiroqchi tuman Ayritom qishlog‘i fuqarolari temiryo‘l ustiga yig‘ilgani aks etgan video tarqalgandi. Keyinchalik bu voqeaga elektr ta‘minotidagi cheklov sabab bo‘lgani ochiqlandi. Mazkur ish bo‘yicha qishloqning 50 nafar fuqarosiga chora ko‘rilgani, shundan 13 nafari sudga chaqirilgani ma’lum bo‘lgandi.
Izoh (0)