Ijtimoiy tarmoqlarda Toshkent viloyatining Chinoz tumanidagi g‘alladan bo‘shagan yer maydonlarining yoqib yuborilgani haqidagi videomurojaat tarqaldi. Holat Davlat ekologiya qo‘mitasi tomonidan bevosita joyiga chiqqan holda o‘rganildi.
Aniqlanishicha, Toshkent viloyatining Chinoz tumani Oxunboboyev hududidagi M-39 avtomobil magistral yo‘li yoqasida joylashgan “Agrokimyo” fermer xo‘jaligi hududiga qarashli g‘alladan bo‘shagan 2 gektar dala maydonidagi somon poyalari yoqib yuborilgan.
Somonning yonishi jarayonida atmosferaga chiqqan zararli moddalar bo‘yicha tabiatga yetkazilgan zararning umumiy miqdori 3,6 million so‘mni tashkil etdi.
Shu bilan birga, fermer xo‘jaligi rahbariga nisbatan Ma’muriy javobgarlik to‘g‘risidagi kodeksning 88-moddasi 3-qismiga asosan 5 barobari (1 million 225 ming so‘m) miqdorida ma’muriy ish qo‘zg‘atildi.
Bundan avval Samarqandda g‘allasi o‘rib olingan 3 gektar yer yonib ketgani, Toshkentdagi Botanika bog‘i hududida yong‘in kelib chiqqani hamda Sirdaryodagi o‘rmon xo‘jaligining salkam 150 gektar maydoni yonib ketgani haqida xabar berilgandi.
Izoh (0)