Buxoroda sodir bo‘lgan YTHda og‘ir tan jarohati olgan yo‘lovchi hayoti saqlab qolindi. Bu haqda “Daryo”ga viloyat IIB YHXB axborot guruhi rahbari Ulug‘bek Shukrullayev xabar berdi.
Ta’kidlanishicha, 2021-yilning 25-iyun kuni Shofirkon tumanidagi “Do‘rmon” MFY hududidan o‘tuvchi davlat ahamiyatiga ega 4K-147-sonli avtomobil yo‘lining 7-kilometrida ikkita Nexia o‘zaro to‘qnashib ketgan.
“Sodir bo‘lgan yo‘l-transport hodisasida ikki avtomashina ham jiddiy talafot ko‘rgan. Natijada yo‘nalishli taksida bo‘lgan bir nafar yo‘lovchi og‘ir tan jarohati olgan. Hodisa tufayli atrofda to‘plangan odamlarning tezkor yordami bilan hushsiz ahvoldagi yo‘lovchi avtomashina ichidan olib chiqilgan va Shofirkon tuman shifoxonasiga olib borilgan. Zudlik bilan birinchi tibbiy yordam ko‘rsatilgan bemorning ahvoli yaxshilangan”, — deydi Ulug‘bek Shukrullayev.
Eslatib o‘tamiz, avvalroq 2021-yilning dastlabki besh oyi davomida O‘zbekistonda 2960 ta yo‘l-transport hodisasi qayd etilgani, ular oqibatida 770 kishi halok bo‘lib, 2365 kishi jarohat olgani xabar berilgandi.
Izoh (0)