30-iyun kuni Toshkent viloyatidan Toshkent shahriga kirishdagi beton to‘siqlar olib tashlandi, shuningdek, avtomobillar poytaxtga kirishdagi “Erkin” posti orqali bemalol harakatlanmoqda. Bu haqda “Daryo” muxbiri xabar berdi.
Eslatib o‘tamiz, O‘zbekistonda so‘nggi kunlarda koronavirus infeksiyasi bilan kasallanish holatlari ortib borayotgani inobatga olinib, Sog‘liqni saqlash vazirligining taklifiga binoan Respublika maxsus komissiyasining qarorlari bilan joriy etilgan tartib va cheklovlarga qo‘shimchalar kiritilgandi. Xususan, 28-iyunidan 12-iyuliga qadar Toshkent shahriga qo‘shni viloyatlardan avtotransport (avtobus, avtomobil) vositalari orqali o‘ta zarurat bo‘lmagan hollarda kirish bo‘yicha cheklovlar o‘rnatilgan edi.
27-iyundan boshlab Toshkent viloyatidan Toshkent shahriga olib chiquvchi yo‘llar beton to‘siqlar bilan berkitila boshlangandi. Shaharga kirib-chiqish faqat yo‘l-patrul postlarida tashkil qilinishi kutilayotgandi. Cheklovlar sabab poytaxtdan Toshkent viloyati hududiga chiquvchi avtobuslar harakati YPX post maskanigacha tashkil qilinishi haqida “Toshshahartransxizmat” axborot ham bergandi.
28-iyun kuni Toshkent viloyatidan Toshkent shahriga o‘tgan “Daryo” muharriri yo‘l-patrul postida hech qanday cheklovlar qo‘llanmayotganiga guvoh bo‘lgan. 30-iyun kuni esa viloyatning Zangiota tumanidan shaharga olib chiquvchi ko‘chalarga o‘rnatilgan beton to‘siqlar olib tashlanganini ma’lum qildi.
Xabar chop etilgandan so‘ng IIVning rasmiy Telegram-kanalida “O‘zbekiston Respublikasi Maxsus komissiyasining Toshkent shahriga kirish-chiqish bo‘yicha rasmiy cheklovlari bilan bog‘liq o‘zgarishlar faqatgina rasmiy manbalar orqali e’lon qilinishi” ma’lum qilingan edi. “Rasmiy bo‘lmagan ma’lumotlarni tarqatmasligingizni so‘raymiz”, — deyiladi IIV axborot xizmati xabarida. Oradan bir sutka o‘tganiga qaramay, IIV Toshkentga kirishdagi beton to‘siqlar nima sababdan olib tashlangani bo‘yicha rasmiy bayonot berganicha yo‘q.
Izoh (0)