Jons Hopkins universiteti ma’lumotlariga ko‘ra, dunyoda koronavirusni yuqtirib olganlar soni 181 488 102 kishiga yetgan, shularning 3 931 204 nafari vafot etgan. Kasallanish holatlarining ko‘pligi bo‘yicha AQSh (33,6 million), Hindiston (30,3 million), Braziliya (18,4 million), Fransiya (5,8 million) yetakchilik qilmoqda. Shuningdek, Rossiya 5,4 million kishi bilan Turkiyani ortda qoldirib, yuqori beshlikka chiqdi.

Foto: gov.uk

Xitoyning SinoVac vaksinasi bolalarda sinovdan o‘tkazildi

Xitoyning Sinovac Biotech Ltd biofarmatsevtika kompaniyasi tomonidan ishlab chiqarilgan CoronaVac vaksinasi 3 yoshdan 17 yoshgacha bo‘lgan bolalar guruhida sinovdan o‘tkazildi. 2020-yil 31-oktabrdan 2-dekabrgacha davom etgan klinik sinovlarning birinchi bosqichida 72 nafar bola ishtirok etdi. O‘sha yilning 12-dekabridan 30-dekabriga qadar o‘tkazilgan ikkinchi bosqichda 480 ishtirokchi qatnashdi.

Klinik sinovlarning birinchi bosqichidan so‘ng, emlangan bolalarning 100 foizida antitanalar paydo bo‘ldi. Ikkinchi bosqichdan so‘ng 1,5 mikrogrammdan doza olgan bolalarda 96,8 foiz hollarda, 3 mikrogrammdan doza olgan bolalarda 100 foiz hollarda antitana aniqlandi. Platsebo olgan bolalarda esa antitana aniqlanmadi.

Ma’lumotlarga ko‘ra, vaksinaning 1,5 mikrogramm dozasini olgan bolalarning 26 foizida, 3 mikrogramm dozasini olganlarning 29 foizida emlashdan keyin 28 kun ichida salbiy reaksiyalar yuzaga kelgan. Ushbu reaksiyalarning aksariyati inyeksiya joyidagi og‘riq bilan bog‘liq.

Sinovlar natijalariga muvofiq olimlar CoronaVac vaksinasini xavfsiz hamda bolalar va o‘smirlarda javob immuniteti hosil qiladi degan xulosaga keldi.

Rossiyada COVID-vaksina tufayli hech kim vafot etmagan

Rossiyada bugunga qadar COVID-19’ga qarshi emlash bilan to‘g‘ridan to‘g‘ri bog‘liq birorta o‘lim qayd etilmagan. Rossiya sog‘liqni saqlash vaziri Mixail Murashkoning ta’kidlashicha ayni paytda davlat xizmatlari portalida emlangan fuqarolarning 30 foiziga tegishli emlashdan keyingi o‘z-o‘zini kuzatish kundaliklari saqlanadi, barcha uzatiladigan ma’lumotlar Sog‘liqni saqlash vazirligi tomonidan umumlashtiriladi.

“Asoratlarning aksariyati inyeksiya joyidagi og‘riq, haroratning qisqa muddatli ko‘tarilishi, kamdan kam uchraydigan va ifodalanmaydigan mayda simptomlardir”, — dedi Murashko.

Vazir mamlakatda 23 million kishi koronavirusga qarshi emlanganini qo‘shimcha qildi.

Gruziyada koronavirusning delta shtammi tarqalmoqda

Yaqin kelajakda Gruziyada koronavirus infeksiyasini yuqtirish va kasallikdan o‘lim holatlari ko‘payishi mumkin. Epidemiologik vaziyatning bunday rivojlanishiga mamlakatda qayd etilgan koronavirusning delta (“hindcha”) shtammi sabab bo‘lishi mumkin. So‘nggi 24 soat ichida 7 kishida mazkur shtamm aniqlangan.

Gruziyada hozirgi kunda koronavirusga chalinish holatlarining 10 foizdan 20 foizgacha bo‘lgan qismi delta shtammga to‘g‘ri kelmoqda. Sog‘liqni saqlash vazirligining ma’lumotlariga ko‘ra, so‘nggi 24 soat ichida Gruziyada 1194 kishida COVID-19 qayd etildi, 22 nafar bemor vafot etdi.

Shuningdek:

  • Hindistonda koronavirusga qarshi qo‘llanilgan vaksinalarning umumiy miqdori AQShda qo‘llanilgan miqdordan oshib ketdi. 28-iyun holatiga ko‘ra, mamlakatda 32,36 million doza vaksina ishlatilgan. AQShda esa bu ko‘rsatkich 32,33 million dozani tashkil qiladi.
  • Gretsiyada yoshlarga COVID-19’ga qarshi emlanish evaziga 150 yevro va’da qilindi. Aksiyada 26 yoshgacha bo‘lgan fuqarolar ishtirok etishi mumkin. Vaksinaning birinchi dozasini olgan fuqaroning elektron hamyoniga 150 yevro miqdorida pul tashlab beriladi. Ushbu elektron hamyon loyihasi asosan ko‘ngilochar va sayyohlik sohalariga qaratilgan. Pullardan samolyot, parom yoki poyezd chiptalari, mashina ijarasi, lagerda joy band qilish, muzey, teatr, kinoteatr yoki arxeologik maydonga chipta sotib olish uchun foydalanish mumkin bo‘ladi.
  • Avstraliya hukumati bir necha toifadagi aholi uchun majburiy vaksinatsiyani joriy qilmoqda. Keksalar, nogironlar, qariyalar uylari xodimlari, shuningdek keksalar va nogironlar uchun maktab-internatlari xodimlari emlanishi shart bo‘ladi. Ushbu toifadagi kishilarning barchasi 2021-yil sentabr oyining o‘rtalariga qadar hech bo‘lmaganda vaksinaning birinchi dozasini olishi kerak. Qariyalar uylari va internatlardagi xodimlar vaksinatsiyasini tashkil etish uchun hukumat 11 million Avstraliya dollari (8,3 million dollar) ajratadi. Ushbu mablag‘ ko‘chma emlash markazlarini tashkil qilishga yo‘naltiriladi. Xodimlarga emlangandan so‘ng bir kunlik dam yoki 185 Avstraliya dollari  (140 dollar) miqdorida bir martalik to‘lov beriladi.