Noyob Peugeot xot-xetchi sotuvga qo‘yildi. Uni faqat puli borlar tomosha qila oladi

Noyob va lyuks avtomobillar savdosiga ixtisoslashgan Luxury Car Consulting avtosaloni noodatiy e’lon bilan bo‘lishdi. Unda Peugeot 205 Turbo 16 modeli 540 ming dollar qiymatida sotuvga qo‘yilgani ko‘rsatilgan. Sotuvchining ta’kidlashicha, ushbu nusxa ideal holatda saqlangan, biroq avtomobilni ko‘rishni istagan xaridor rostdan ham puli borligini isbotlashi, ya’ni bankdan hisobraqami bo‘yicha ma’lumotnoma olib kelishi kerak, deb xabar beradi Motor.

Sotuvga qo‘yilgan model kolleksionerlar orasida mashhurlikka ega: Peugeot 205 Turbo 16’dan jami 200 nusxa chiqarilgan. Avtomobil o‘ziga xos komponovka va 200 ot kuchini taqdim etishga qodir 1,8 litrli motori bilan ajralib turadi.

Carscoops nashri noyob modelning bir nechta suratlari bilan bo‘lishgan, ammo ularning sotuvga qo‘yilgan mashinaga aloqasi yo‘q. Jurnalistlar qiziqish bildirgan xaridorlar sifatida sotuvchidan surat so‘ragan, biroq u shaxsni tasdiqlovchi hujjat va hisobraqami haqidagi ma’lumotnomani so‘ragan. Ta’kidlanishicha, bu keng tarqalgan sxema bo‘lib, odatda noyob giperkarlarni sotishga qo‘llaniladi.

Avvalroq AQShda eng kam masofa bosgan McLaren F1 superkari auksionga qo‘yilgani to‘g‘risida xabar berilgandi. Gooding & Company katalogida paydo bo‘lgan McLaren F1 hozirga qadar 390 kilometr yo‘l bosgan va holati idealga yaqin, hatto uning original shinalari saqlanib qolgan.