Davlat soliq qo‘mitasi va “Hududiy elektr tarmoqlari” AJning Xorazm, Farg‘ona, Navoiy va Samarqand viloyatlaridagi hududiy korxonalari o‘rtasida bo‘lib o‘tgan sud jarayonlari yakunlandi. Unga ko‘ra endi O‘zbekistonda reaktiv energiya uchun soliq to‘lanadi.
Ma’lum qilinishicha, shu kungacha Yirik soliq to‘lovchilar bo‘yicha hududlararo davlat soliq inspeksiyasi hamda “Hududiy elektr tarmoqlari” aksiyadorlik jamiyati o‘rtasida reaktiv energiyaga ustama uchun qo‘shilgan qiymat solig‘i to‘lanishi borasida bir qator noaniqliklar mavjud edi.
Mazkur noaniqlikning sababi “Hududiy elektr tarmoqlari” AJ tomonidan reaktiv energiyani realizatsiya qilishdan olinadigan daromaddan QQS hisoblanmasdan va to‘lanmasdan kelinayotgani edi.
Ma’lumot o‘rnida, mazkur jamiyat tarkibiga kiruvchi elektr stansiyalar (IES va GES) tomonidan o‘tgan 2016—2020-yillar davomida jami 852,7 milliard so‘mlik 50,9 milliard kilovatt-soat reaktiv energiya ishlab chiqarilgan va tarmoqqa uzatilgan.
Davlat soliq xizmati organlari, xususan, Yirik soliq to‘lovchilar bo‘yicha hududlararo davlat soliq inspeksiyasi Soliq kodeksining 45 va 238-moddalariga asoslangan holda elektr energiyasi — tovarlar deb e’tirof etilib, tovarlarni (xizmatlarni) realizatsiya qilish bo‘yicha aylanma QQS soliq solish obyekti hisoblanishini ta’kidlab kelmoqda.
Davlat soliq xizmati organlari hamda “Hududiy elektr tarmoqlari” AJ o‘rtasidagi noaniqlikka sud nuqta qo‘ydi. Ya’ni Xorazm va Farg‘ona hududiy elektr tarmoqlari korxonasi bilan bo‘lgan navbatdagi sud jarayonining apellyatsiya instansiyasida ham Yirik soliq to‘lovchilar bo‘yicha hududlararo davlat soliq inspeksiyasi pozitsiyasi qonuniy va to‘g‘ri deb topildi. Shuningdek, Navoiy hududiy elektr tarmoqlari korxonasi bilan bo‘lgan sudning birinchi instansiyasi yakunida ham xuddi shunday qaror qabul qilindi.
Yirik soliq to‘lovchilar bo‘yicha hududlararo davlat soliq inspeksiyasi mutaxassislari tomonidan aniqlangan ma’lumotlarga ko‘ra, 14 ta HETK tomonidan jami 585,4 milliard so‘mlik 38,5 milliard kilovatt-soat (2016-yilda — 72,1 milliard, 2017-yilda — 86,9 milliard, 2018-yilda — 94,6 milliard, 2019-yilda — 174,4 milliard, 2020-yil 9 oyida — 157,3 milliard so‘m) reaktiv energiya shartnomalar asosida realizatsiya qilinganligi va 109,2 milliard so‘mlik qo‘shilgan qiymat solig‘i budjetga to‘lanmasdan qolganligi ma’lum bo‘ldi.
Izoh (0)