Amerikalik olimlar uni taqqan odamda koronavirus infeksiyasi bor-yo‘qligini aniqlashga imkon beruvchi himoya niqobini ishlab chiqdi. Bu haqda Massachusets texnologiya instituti (MIT) saytiga tayanib, “RBK” xabar berdi.
Niqoblarga joylashtirilgan bir martalik datchiklar 90 daqiqada inson tanasida infeksiya mavjudligini aniqlashga imkon beradi. Bunday datchiklarni boshqa turdagi niqoblar va laboratoriya xalatlariga ham qadash mumkin, shuningdek, ular boshqa viruslarni aniqlash uchun moslashtirilishi mumkin. Ilgari ulardan ebola va zika viruslarini aniqlashda foydalanilgan.
Niqobni taqqan inson nafasidagi virus zarralarini aniqlaydigan datchiklar niqobning ichki qismiga joylashtirilgan bo‘ladi. Xabarda aytilishicha, maxfiylik nuqtayi nazaridan ham natijalar faqat niqobning ichki qismida ko‘rinadi.
Garvard universitetining Vissa biologik muhandislik instituti tadqiqotchisi Piter Nguyen niqobdagi datchiklarning PZR-testlari kabi COVID-19’ga o‘ta sezgirligini ta’kidladi.
“Bu tez tibbiy yordam xodimlari, tibbiyot xodimlari va harbiy xizmatchilarga yangi avlod biosensorlaridan foydalanish imkonini yaratishi mumkinligiga ishonamiz”, — dedi MIT professori Jeyms Kollinz.
Niqobni yaratishda Massachusets texnologiya instituti mutaxassislari Garvard universitetidagi hamkasblari bilan hamkorlik qilgan.
Avvalroq AQShdagi Jorj Vashington universitetida mobil telefonlar yordamida koronavirusni aniqlovchi kichik qurilma, Eronda koronavirusni yarim daqiqada aniqlovchi nanotest yaratilgani haqida xabar berilgan edi.
Shuningdek, Buyuk Britaniyada COVID-19’ni bir necha soniyada aniqlaydigan test ishlab chiqilgan, Germaniyada esa virusni aniqlovchi dunyodagi eng tezkor test tizimi yaratilgandi.
Izoh (0)