Hindiston hukumati 27-iyun kuni mamlakat shimolidagi Jammu tumani aviabazasida sodir etilgan teraktda uchuvchisiz uchish vositalaridan foydalanilganini rasman tasdiqladi. Jammu va Kashmir ittifoq hududi politsiyasining rahbari Dilbagx Singx bu haqda jurnalistlarga ma’lum qildi, deb yozadi “TASS”.
Foto: TAdviser
“Jammu havo kuchlari bazasiga qilingan hujum terrorchilik harakati edi. Jammu aerodromidagi ikkala portlashda ham bomba ortilgan dronlardan foydalanilgan”, — dedi Singx NDTV telekanalida.
Rasmiylarning axborotiga ko‘ra, bu Hindistondagi muhim nuqtalarni nishonga olish uchun terrorchilarning masofadan turib boshqariladigan uchuvchisiz uchar qurilmalardan birinchi marta foydalanishi.
28-iyun kuni Pokiston bilan chegaradan 14 kilometr uzoqlikdagi aeroportda sodir etilgan quvvati past portlashlar oqibatida Hindiston harbiy havo kuchlarining ikki xodimi yengil jarohat oldi. Rasmiy ma’lumotlarga ko‘ra, birinchi portlash binolardan birining tomiga zarar yetkazgan, ikkinchi portlash yerda sodir bo‘lgan va vayronagarchilik keltirmagan.
Rasmiylarning aytishicha, dronlar qayerdan uchirilgani hali noma’lum, ularning parvoz yo‘lini aniqlash bo‘yicha tekshiruv olib borilmoqda. Politsiya hujum ortida qo‘shni Pokistonda joylashgan ekstremistlar turibdi deb taxmin qilmoqda. Avvalroq ekstremistlar qurol-yarog‘ va o‘q-dorilarni uzatishda dronlardan foydalanayotgani haqida xabar berilgan edi. Xususan, ular so‘nggi bir yil ichida uchuvchisiz uchar qurilmalar yordamida AK-47 avtomatlari, to‘pponcha va miltiqlarni qo‘shni hududga yetkazib berishga urinib kelgan. Ammo ilgari Hindistonda terrorchilik hujumlari uchun dronlardan foydalanilmagan.
Kashmir hududi 1947-yildan beri Hindiston va Pokiston o‘rtasida ziddiyatli mavzu bo‘lib qolmoqda, o‘sha yili Britaniyadan mustaqil bo‘lgan Hindiston diniy yo‘nalish bo‘yicha ikki davlatga bo‘lingandi. Ayni paytda mintaqada davlat chegarasi yo‘q: uning hududi nazorat chizig‘i bilan bo‘lingan. Hududning Hindiston qismidagi guruhlar mamlakatdan ajralib chiqish tarafdori. Nyu-Dehli qo‘shni Pokistonni ekstremistlarni qo‘llab-quvvatlayotganlikda ayblab keladi; Islomobod esa bu ayblovlarni rad etadi.
