Ishdagi ishq: Bollivudning film ijodkorlariga turmushga chiqqan aktrisalari

Oila qurishiga kasbiy faoliyati sabab bo‘lgan hind aktrisalari haqida ma’lumot berib o‘tamiz.

Rani Mukxerji va Aditya Chopra (19 yildan buyon birga yashaydigan juftlikning turmush qurganiga 7 yil bo‘lgan)

Bollivud yulduzi Ranining shou-biznesning boshqa vakillari Amir Xon, Govinda va Abhishek Bachchan bilan munosabatlarining bari omadsiz yakun topgan. 2002-yilda “Do‘st bo‘lib qolamizmi?” filmining suratga olish jarayonlarida rejissor Aditya bilan bir-birini yoqtirib qolgan, ammo u oilali ekani sabab munosabatlarni sir tutishga to‘g‘ri kelgan. “Vir va Zara”ning suratga olish jarayonida esa bir-biriga bo‘lgan tuyg‘ularini yashirib bo‘lmagan. Rejissor oilasi bilan ajrashganidan keyin Rani unga 2014-yilda turmushga chiqqan. Hozirgi kunda ularning Adira ismli qizi bor.

Shridevi va Boni Kapur (turmush qurganidan keyin 21 yil birga yashagan)

1970-yillarning oxirida tamil filmlaridan birida Shridevini ko‘rib qolgan prodyuser Boni Kapur katta gonorar evaziga “Miss Hindiston” filmida suratga tushishga taklif qilgan. Avvaliga unga e’tibor bermagan aktrisa keyinroq Bonining niyati ekanini tushunib yetgan. Juftlik 1997-yilda turmush qurgan, ammo bu vaqtda prodyuserning oilasi va farzandlari bo‘lgan. Boni oilasidan voz kechib, Shridevi bilan yashashni boshlagan. Yulduzlar 2018-yil aktrisa hayotdan ko‘z yumguniga qadar birga baxtli hayot kechirgan.

Sonali Bendre va Goldi Bexl (23 yildan buyon munosabatda bo‘lgan)

Juftlik 1994-yilda suratga olish jarayonlarida tanishgan. Keyinchalik Sonali 1998-yilda “Bir kuni Hindistonda” filmida suratga tushish uchun shartnoma imzolaydi. To‘rt yil o‘tib turmush qurgan juftlikning Ranvir ismli farzandi bor.

Punam Dxillon va Ashok Takeriya (turmush qurganidan keyin 9 yil birga yashagan)

Punam Ashok bilan umumiy do‘sti Umesh Mehra orqali tanishgan. Takeriyaning 1988-yilda turmush qilish taklifidan keyin Punam kino sohasini tark etishga qaror qilgan. Turmushi davomida ikki nafar farzandli bo‘lgan Punam o‘zini oilasiga bag‘ishlagan. Oilaviy muammolar sabab 1997-yilda Punam ajrashishga ahd qilgan. Bunga turmush o‘rtog‘ining hammasiga befarq ekanini sabab qilib ko‘rsatgan. Shundan keyin 1997-yilda munosabatlariga nuqta qo‘ygan.

Ravina Tandon va Anil Tadani (turmush qurganiga 17 yil bo‘lgan)

Debyut rolidan keyin mashhurlikka erishgan Ravina Ajay Devgan hamda Akshay Kumar bilan ham uchrashib yurganiga qaramay, haqiqiy baxtni prodyuser Anildan topgan. Akshay bilan munosabatlariga nuqta qo‘ygach, mashhurlikdan voz kechgan va o‘zini ikki nafar asrab olgan farzandini tarbiyalashga bag‘ishlagan. O‘zini prodyuserlikda sinab ko‘rgan va aynan shu faoliyati chog‘ida orzusidagi erkakni uchratgan. Bu vaqtda Anil kinoprokatlar bilan shug‘ullanayotgan bo‘lgan. U bundan avval oila qurgan, ammo oilasi o‘xshamagan. Ilk bor 2004-yil 4-avgustda tanishgan juftlik 26-oktabrda unashtirilgan. Fevral oyida esa rishtalarini nikoh bilan mustahkamlagan.

Kalki Koechlin va Anurag Kashyal (turmush qurganidan keyin 4 yil birga yashagan)

Aktrisa ilk bor rejissor Anurag Kashyapning “Dev.D” filmida suratga tushgan. Suratga olish maydonchasida tanishgan juftlik keyinchalik uchrasha boshlagan. Kalki Anuragning keyingi “Sariq etikdagi qiz” hamda “Shayton” nomli loyihalarida ham ishtirok etgan. 2011-yilda turmush qurgan mashhurlar oradan ikki yil o‘tib ayrilayotganini e’lon qilgan. Bunga rejissorning aktrisa Xuma Kureshiga ilakishib qolgani sabab bo‘lgan, deb taxmin qilingan. Ular munosabatlariga rasman 2014-yilda nuqta qo‘ygan.