Toshkent shahriga kirishdagi postlar yopilmoqda, Zangiota tumani markaziga kirish uchun faqat “Erkin” posti ochiq qoldirilgan. Bu haqda “Daryo” muxbiri xabar bermoqda.
Ma’lum bo‘lishicha, 27-iyun kuni soat 17:00 atrofidan boshlab Toshkent shahriga olib kiruvchi deyarli yo‘llar beton to‘siqlar bilan yopilmoqda. Shaharga kiruvchi va chiquvchilar tarkibini samarali nazorat qilish maqsadida sanoqli postlargina ochiq qoldiriladi.
Xususan, Zangiota tumani markazi (“Raysentr”)ga kirish faqat “Erkin” posti orqali amalga oshirilmoqda. Ushbu hududdagi Toshkentga kirish-chiqish imkonini beruvchi boshqa barcha yo‘llar yopiqligi sabab “Bek Baraka” va sobiq “Abu Saxiy” bozorlari yo‘llarida katta tirbandliklar yuzaga kelgan.
Avvalroq O‘zbekistonda COVID-19 ga chalinish holatlari soni keskin ko‘paygani sababli Sog‘liqni saqlash vazirligi taklifiga binoan koronavirusga qarshi kurashish bo‘yicha Respublika maxsus komissiyasi koronavirus sabab 28-iyunidan 12-iyuliga qadar Toshkent shahriga qo‘shni viloyatlardan avtotransport (avtobus, avtomobil) vositalari orqali o‘ta zarurat bo‘lmagan hollarda kirish bo‘yicha cheklovlar o‘rnatgani haqida xabar berilgan edi.
Eslatib o‘tamiz, 25-iyun kuni koronavirus infeksiyasini yuqtirib olish bilan bog‘liq 546 ta yangi holat ro‘yxatga olinib, kunlik kasallanish bo‘yicha 2021-yilning eng yuqori ko‘rsatkichi bo‘lgandi. Mamlakatda kunlik kasallanish holatlari soni yana ortib bormoqda. Shu sababli respublika bo‘ylab 28-iyundan karantin cheklovlari kuchaytiriladi. Ko‘ngilochar va ovqatlanish obyektlari faoliyatiga cheklovlar o‘rnatiladi. Bundan tashqari, Toshkentda 18 yoshdan oshganlar 28-iyundan koronavirusga qarshi ommaviy emlanishi ma’lum qilindi.
Izoh (0)