UzAgroLogistics Center agrologistika markazi, RJD Logistika AJ va “Rossiya eksport markazi” AJ Rossiya—O‘zbekiston logistika koridorini rivojlantirish hamda agrosanoat import va eksport yuklarini “Agroekspress” tezyurar refrijeratorli konteynerli poyezdlarida tashish borasida hamkorlik bo‘yicha kelishuv imzoladi. Bu haqda Qishloq xo‘jaligi vazirligi xabar berdi.
Hujjatda “Agroekspress” konteynerli tezyurar temiryo‘l poyezdlari harakatini yo‘lga qo‘yish orqali Rossiya—O‘zbekiston logistika koridori loyihasini rivojlantirish va qo‘llab-quvvatlash sohasida tomonlarning o‘zaro manfaatli hamkorligini takomillashtirish nazarda tutilgan. Bundan tashqari, noxomashyoviy noenergetik eksportni rivojlantirish, transport xizmatlari eksporti, shuningdek, boshqa hamroh ish va xizmatlarni taraqqiy ettirish sohasida hamkorlikdagi loyihalarni amalga oshirish ko‘zda tutilgan.
“2021-yilning birinchi choragida Rossiyadan O‘zbekistonga eksport tashishlar hajmi besh foizga oshdi va deyarli bir milliard dollarni tashkil etdi. Loyihaning to‘laqonli ishga tushirilishi o‘zaro manfaatli marshrutlarni shakllantiradi va rossiyalik eksportchilarni kompleks logistika xizmati hamda Rossiya mahsulotlarini uzilishlarsiz O‘zbekistonga yetkazish kanali bilan ta’minlaydi, bu esa o‘z navbatida ikki mamlakatning yillik tovar aylanmasi ko‘rsatkichlarini yangi sifat bosqichiga ko‘taradi”, — deydi “Rossiya eksport markazi” bosh direktori Veronika Nikishina.
Telegram’dagi “Nigoh” kanalining yozishicha, O‘zbekistonda un va go‘sht narxlarini mazkur “Agroekspress” poyezdlarini ishga tushirish orqali barqarorlashtirish rejalashtirilmoqda.
“Gap hatto tashish uchun eng nozik hisoblangan yuklarning ham butligini kafolatlaydigan refrijeratorli konteynerli poyezdlar haqida ketmoqda: O‘zbekiston meva va sabzavotlarni yuboradi evaziga esa go‘sht va un oladi”, — deyiladi xabarda.
O‘zbekistondan Rossiyaga dastlabki sinov “Agroekspress”ni (qariyb 40 vagon) 2021-yilning kuzida jo‘natish rejalashtirilgan.
Izoh (0)