Rossiyaning Leningrad viloyati Vsevolojsk tumanidagi qurilish obyektida 22 yoshli o‘zbekistonlik muhojir balandlikdan yiqilib tushib, vafot etdi, deb xabar beradi “78.ru”.
Nashrning huquq-tartibot organlaridagi manbasining ma’lum qilishicha, 17-iyun kuni Vsevolojsk shifoxonasiga tez yordam mashinasida 22 yoshli O‘zbekiston fuqarosi og‘ir ahvolda olib kelingan. Shifokorlar unga balandlikdan yiqilishga oid tan jarohatlari tashxisini qo‘ygan. Oradan to‘rt kun o‘tgach, 21-iyun kuni bemor reanimatsiya bo‘limida vafot etgan.
Aniqlanishicha, o‘zbekistonlik muhojir tumanning Ioann Kronshtadtskiy ko‘chasidagi 12 qavatli turar joy binosining qurilishida ishlagan. Qurilish boshqaruvchisining so‘zlariga ko‘ra, erkak kompaniya bilan shartnoma asosida ishlagan, ko‘ngilsiz hodisa yuz bergan kuni ish joyida bo‘lgan va noma’lum sababga ko‘ra, balandlikdan tushib ketgan, taxminlarga ko‘ra, ikkinchi qavatdan. Hozirda holat yuzasidan tekshiruv ishlari olib borilmoqda.
Eslatib o‘tamiz, 2019-yilning sentabrida ham Leningrad viloyatining Vsevolojsk tumanidagi qurilish maydonchasida 35 yoshli O‘zbekiston fuqarosi balandlikdan qulash oqibatida halok bo‘lgandi.
Izoh (0)