Buxoro tarixiy markazida joylashgan Gavkushon ko‘chasida mehmonxona qurilishi boshlandi, ammo bu ovoza bo‘lganidan keyin qurilish to‘xtatildi, deb xabar bermoqda “Anhor.uz” Madaniy meros departamentiga tayanib.
Ma’lum qilinishicha, 19-iyun kuni “Troll.uz” Telegram kanalida “Qurilish sohasidagi muammolar. Buxorodagi ‘Gavkushon’ mahallasi misolida” nomli videolavha e’lon qilindi. Unda Buxoro tarixiy markazida joylashgan Gavkushon ko‘chasida qurilishi rejalashtirilgan mehmonxona bo‘yicha so‘z borgan.
Mazkur videolavha bo‘yicha tegishli tashkilotlar vakillari bilan birgalikda joyiga chiqib o‘rganilganda, Buxoro shahar hokimining 2018-yil 28-iyundagi qaroriga asosan Prime Real Estate MChJga Buxoro shahrining Xo‘ja Rangrez ko‘chasidagi qishloq xo‘jaligida foydalanilmaydigan yerlar hisobidan 500 kvadrat metr yer maydoni ajratilgani aniqlangan. Shuningdek, Buxoro shahar hokimining 2021-yil 25-martdagi qaroriga asosan Buxoro shahar hokimining 2018-yil 28-iyundagi qarorining birinchi va ikkinchi bandidagi “Xo‘ja Rangrez ko‘chasi” so‘zlari “Govkushon ko‘chasi” so‘zlari bilan o‘zgartirilgan.
Madaniyat vazirligi huzuridagi Madaniy meros departamenti Ilmiy-ekspert kengashining 2019-yil 12-dekabrdagi yig‘ilish bayoniga muvofiq, belgilangan hududda mehmonxona qurilishi bo‘yicha loyiha taklifi balandligini yer sathidan 7,1 metrdan oshirmaslik sharti bilan ma’qullangan.
Buxoro viloyati qurilish bosh boshqarmasi huzuridagi Arxitektura-shaharsozlik kengashining 2020-yil 10-fevraldagi yig‘ilish bayonnomasiga asosan mazkur hududda Prime Real Estate tomonidan mehmonxona bino-inshooti qurilishini loyihalashtirish uchun bosh rejasi va fasad ko‘rinishlari kelishilgan.
Prime Real Estate tomonidan qurilish ishlari olib boriladigan hudud tozalanib, atrofi o‘rab olingan bo‘lsa ham barcha qurilish ishlari to‘xtatilgan. Ayni paytda hududda Fanlar akademiyasi Milliy arxeologiya instituti mutaxassislari tomonidan arxeologik qazilma ishlari olib borilmoqda.
Mazkur loyiha bo‘yicha avval olib borilgan o‘rganish davomida jamiyat rahbariyatiga ushbu hudud “Buxoro tarixiy markazi”da ekanligi va tarixiy obidalar zich joylashganligi sababli mehmonxona tashkil etish loyihasini YuNESKO Umumjahon merosi markazi bilan kelishish shart ekanligi tushuntirilgan.
Ma’lum bo‘lishicha, mazkur loyihaning “Buxoro tarixiy markazi” — butunjahon merosi obyektiga bo‘lgan ta’sirini baholash hisobotini tayyorlash va o‘rnatilgan tartibda xalqaro tashkilotlar bilan kelishish maqsadida Prime Real Estate tomonidan xorijiy ekspertlar jalb qilingan.
Loyiha tashabbuskoriga YuNESKO va IKOMOS mutaxassislari tomonidan loyihaga ijobiy xulosa berilmagunga qadar qurilish ishlarini boshlamaslik lozimligi bo‘yicha tushuntirishlar berilgan.
Prezidentning 2021-yil aprel oyidagi farmoni bilan O‘zbekistonda madaniy meros muhofazasi kuchaytirilishi belgilangan. Farmon bilan Turizm va sport vazirligi, Fanlar akademiyasi, Qurilish vazirligi, Kadastr agentligi, Qoraqalpog‘iston Vazirlar Kengashi, viloyatlar va Toshkent shahar hokimliklari Bosh prokuratura bilan birgalikda uch oy muddatda madaniy meros obyektlarining qo‘riqlanadigan tegralarida noqonuniy qurilgan qurilmalar va bino-inshootlarni bartaraf etish hamda ularning yer maydonlaridan noqonuniy foydalanishning oldini olish bo‘yicha chora-tadbirlarni belgilash yuklatilgan.
O‘zbekiston Vazirlar Mahkamasining 14-iyundagi qarori bilan O‘zbekistonda YuNESKO bilan hamkorlikda madaniy meros masalalari bo‘yicha Xalqaro maslahat qo‘mitasi tashkil etildi.
Eslatib o‘tamiz, may oyida Toshkentdagi Mingo‘rik yodgorligi yonidagi IIBB Ma’naviyat va ma’rifat markazi binosi qurilishi Madaniy meros departamenti ruxsatisiz boshlangani aniqlangandi.
Izoh (0)