“YTHlar oqibatida koronavirusdan ko‘ra ko‘proq odam vafot etmoqda” — Farg‘ona viloyati IIB boshlig‘i

Farg‘onada viloyat ichki ishlar boshqarmasi boshlig‘i polkovnik Doniyor Toshxo‘jayev jurnalistlar va blogerlar ishtirokida bo‘lib o‘tgan matbuot anjumanida viloyatda yo‘l-transport hodisalarining ko‘pligi bo‘yicha berilgan savollarga javob qaytardi, deb xabar beradi O‘zA.

“Viloyatimizda o‘lim bilan yakunlangan yo‘l-transport hodisalarining ko‘pligi meni eng ko‘p bezovta qiladigan masala. Tahlillardan ko‘rinadiki, hatto koronavirusdan ham ko‘ra bu borada ko‘p odam vafot etyapti. Bir raqamga e’tibor qaratmoqchiman. 2021-yilning o‘tgan davri mobaynida 23 ta qotillik jinoyati sodir bo‘lgan. Uning bittasi xodimlarimiz tomonidan aniqlanib, mudhish voqeaning oldini olishga erishildi. Afsuski, sodir etilgan YTHlarda esa 108 kishi hayotdan ko‘z yumgan. Bu juda ham ayanchli. Biz yo‘l-transport hodisalarining oldini olish, yo‘l harakati xavfsizligini ta’minlash borasida ko‘plab ishlarni olib bormoqdamiz. Foto va videofiksatsiya vositalari ishlayapti, hatto dronlarni ham uchirdik. Ammo bu borada hali qilinadigan ishlarimiz ko‘p. Avvalo, haydovchilar, aholi o‘rtasida huquqiy madaniyatni oshirishimiz kerak”, — deydi Toshxo‘jayev.

Shuningdek, Farg‘ona viloyat ichki ishlar boshqarmasi boshlig‘i “Har bir yo‘l-transport hodisasida o‘zimni aybdor his qilaman”, — deya qo‘shimcha qilgan.

Ta’kidlanishicha, anjuman doirasida O‘zbekiston Prezidentining viloyatga tashrifi doirasida belgilab berilgan ustuvor vazifalar ijrosi, jinoyatchilik va huquqbuzarliklarning oldini olish, yo‘l harakati xavfsizligini ta’minlash kabi yo‘nalishlarda amalga oshirilayotgan ishlar borasida ochiq va samimiy muloqot tashkil etilgan. Shuningdek, 3-sektor hududida mahallabay ishlash tizimi, “temir daftar”, “ayollar daftari” va “yoshlar daftari” bo‘yicha qilinayotgan ishlar xususida ma’lumot berilgan.