Toshkentda o‘zganing Lacetti’sini minib qochgan 21 yoshli yigit IIBga qo‘ng‘iroq qilib, qilgan ishidan pushaymonligini bildirdi

Toshkentda o‘zganing avtomobilini minib qochgan qonunbuzar fuqaro qo‘lga olindi, deb xabar beradi poytaxt IIBB axborot xizmati.

Ma’lum qilinishicha, 21-iyun kuni soat 04:40 da Toshkent shahar IIBB navbatchilik qismiga Lacetti rusumli avtomobil noma’lum shaxs tomonidan Shayxontohur tumani Alisher Navoiy ko‘chasida olib qochilgani haqida xabar kelib tushgan.

Ko‘rilgan tezkor choralar davomida soat 05:40 da Toshkent shahar IIBB YHXB YPX inspektorlari mazkur avtomobilni Yunusobod tumanida to‘xtab turganini ko‘rib qolgan.

Qoldirib ketilgan avtomobil ko‘zdan kechirilayotganida 102 raqamiga 2000-yilda tug‘ilgan farg‘onalik Shavkatjon K. ismli fuqaro qo‘ng‘iroq qilib, yuqoridagi avtomobilni u olib qochganini va bundan pushaymon ekanligini ma’lum qilgan. Shavkatjon K. ichki ishlar organlari xodimlari tomonidan qo‘lga olingan.

Hujjatlar tegishli tartibda rasmiylashtirilgach, Shavkatjon K. Yunusobod tumani IIO FMBga yetkazilgan.

Avvalroq Andijonda olib qochilgan Spark ikkita avtomobilga borib urilgani, Farg‘onada sobiq kuyov qaynanasining mashinasini olib qochgani, Toshkentda 4-sinf o‘quvchisi Nexia-3’ni olib qochgani, Andijondan olib qochilgan Spark Namanganda ehtiyot qismlariga ajratilgan holda topilgani to‘g‘risida xabar berilgandi.