Namanganda fuqarolarning pasportiga qalbaki vizalar qo‘yish bilan shug‘ullanib kelgan shaxsga nisbatan jinoyat ishi qo‘zg‘atildi

Namanganda fuqarolarning pasportiga qalbaki vizalar qo‘yish bilan shug‘ullanib kelgan shaxsga nisbatan jinoyat ishi qo‘zg‘atildi. Bu haqda “Daryo” muxbiri Azizbek Abduvaliyev xabar bermoqda.

Pop tumanida yashovchi, 1974-yilda tug‘ilgan Usmonjon Akramov (ism-shariflar o‘zgartirilgan) dastlab Kosonsoy tumanida yashovchi Qodir Mahmudovning ishonchiga kirib, unga chet elga chiqishga ruxsat beruvchi viza rasmiylashtirib berishni va’da qiladi. 2020-yil fevral oyida uning pasportiga Ispaniyaga borish huquqini beruvchi va tartib raqamga ega viza uriladi.

Usmonjon Akramov buning evaziga 2000 dollarni sanab oladi va o‘z ehtiyojlari uchun ishlatib yuboradi.

Bundan tashqari, shu tumanda yashovchi To‘rabek Erkinovga ham xorijga chiqishga ruxsat beruvchi viza rasmiylashtirishda ko‘mak va’da qilinadi. 2020-yil fevral oyida uning pasportiga ham Ispaniyaga borish huquqini beruvchi va tartib raqamga ega qalbaki viza uriladi. Faqat “gonorar” summasi biroz oshiriladi va buning uchun 2100 dollar haq olinadi.

Tashqi ishlar vazirligi konsullik-huquqiy departamenti tomonidan 2021-yil mart oyida berilgan xulosada ikki fuqaroning ham pasportiga qo‘yilgan vizalar qalbaki ekanligi ko‘rsatib o‘tilgan.

Mazkur holat yuzasidan 2021-yil 12-iyun kuni Kosonsoy tuman IIB tomonidan Usmonjon Akramovga nisbatan jinoiy ish qo‘zg‘atildi. Hozirda dastlabki tergov harakatlari olib borilmoqda.