Ishtixon tuman hokimi matbuot kotibiga noo‘rin harakatlar sodir etib, haqorat qilgan ikki kishi 15 sutkaga qamaldi, deb xabar bermoqda hokimlik matbuot xizmati.

Foto: Ishtixon tuman hokimligi matbuot xizmati

Ma’lum qilinishicha, Ishtixon dehqon bozorida 14-iyun kuni MY5  telekanali muxbirlari va Ishtixon tuman hokimining axborot siyosati masalalari bo‘yicha maslahatchisi Ilhomjon Boboyev bozordagi holatni o‘rganish vaqtida 29 yoshli N.O. va 33 yoshli M.U. jurnalistlar bilan bo‘lgan holatni hamda o‘rtadagi vaziyatni anglamagan holda Ilhomjon Boboyevga nisbatan noo‘rin harakatlar sodir etib, haqorat qilib, hokimlik xodimining xizmat faoliyatiga to‘g‘ridan to‘g‘ri aralashgan.

Foto: Ishtixon tuman hokimligi matbuot xizmati

N.O. va M.U. Ma’muriy javobgarlik to‘g‘risidagi kodeksning 183-moddasida nazarda tutilgan huquqbuzarlik (mayda bezorilik)ni sodir etgan deb topilib, 15 sutka qamoq jazosi tayinlangan. Ushbu fuqarolarni qamoqda saqlash bilan bog‘liq bo‘lgan xarajatlar uchun har bir kunga eng kam ish haqining 15 foizi miqdorida davlat daromadiga pul undirilishi ham belgilangan.

Xabarda ta’kidlanishicha, ayni paytda odamlarni to‘plash hamda hokimiyat vakillariga nisbatan qarshilik ko‘rsatishda targ‘ibot ishlarini amalga oshirishda faol bo‘lgan fuqarolar bo‘yicha surishtiruv ishlari amalga oshirilmoqda.

Eslatib o‘tamiz, Ishtixon tuman hokimining 2021-yil 16-iyundagi farmoyishi bilan Ilhomjon Boboyevga hayfsan berilgandi. U 14-iyun kuni tuman dehqon bozorida sodir bo‘lgan yong‘in oqibatlari to‘g‘risida reportaj tayyorlash uchun Samarqandga kelgan MY5 telekanali operatori kamerasi fleshkasini yo‘q qilgan. Voqea joyida bo‘lganlar u kartani og‘ziga solib, chaynab yuborganini aytgan. Ammo hokimlik matbuot kotibi kamera fleshkasini olmaganini va uni yutib yubormaganini, bu gaplar asossiz ekanligini bildirgan.