2010-yil yozi. 19 yoshli futbolchilar o‘rtasida Yevropa chempionati. Fransiya terma jamoasining asosiy o‘ng qanot himoyachisi Loik Nego Antuan Grizmann bilan mehmonxonaning bir xonasida yashardi. Ikkalasi ham Ispaniyaga qarshi finalda maydonga tushdi va oltin medalni qo‘lga kiritdi (2:1).

2021-yil yozi. Vengriya terma jamoasining o‘ng qanot himoyachisi Loik Nego Yevro—2020 da Antuan Grizmannga qarshi o‘ynadi. Vengriyaliklar Jahon chempioni bilan kutilmaganda durang o‘ynadi (1:1).

Bu qanday sodir bo‘ldi? Qanday qilib Fransiyaning o‘ng qanot himoyachisi Vengriya tarkibida maydonga tushdi?

Foto: Getty Images

Fransiya termasidagi muvaffaqiyatli o‘yinidan keyin Nego “Roma”ga o‘tdi, Totti uning mashinasini tuzatib berdi. Lekin tez orada futbolchi Vengriyadan boshqa hech kimga kerak bo‘lmay qoldi

Loik 1991-yilda tavallud topgan. Uning bolaligi Garj-le-Gonesseda o‘tgan va Fransiya terma jamoasining bo‘lajak hujumchisi Vissam ben-Yedder bilan tez-tez aloqada bo‘lib turgan. Ular birgalikda hududlararo futbolda qatnashib turardi.

Nego “Nant” akademiyasiga qabul qilindi va faoliyatida darhol o‘sish kuzatildi: yoshlar o‘rtasidagi Yevro—2009 yarim finali, 2010-yilda oltin, 20 yoshlilar o‘rtasidagi 2011-yilgi mundial, “Nant” safida debyut — futbolchi uchun buyuk faoliyatning boshlanishi edi. Shundan so‘ng futbolchi “Roma”ga o‘tdi.

Foto: Getty Images

Rimliklarning asosiy jamoasida Loik maydonga tushmadi (o‘sha vaqtda eng esda qolarli xotira: Franchesto Totti yosh fransuz mashg‘ulotlarga mashinada kelmaganini ko‘radi. Nego mashinasini urib olganini eshitadi va undan kalitni olib, mashinani ustaga topshiradi. Totti Loikka mashinani ideal holatda topshiradi).

“Roma”dan keyin “Standart” jamoasi Negoning keyingi manziliga aylandi. Hech omadi yurishmayotgan futbolchiga 2013-yilda Vengriyaning “Uypesht” jamoasidan taklif tushadi.

“Bu juda og‘ir vaziyat edi. Men Fransiya, Italiya, Belgiyada o‘ynaganman, endi esa Vengriyadan taklif tushdi. Lekin tanlovim yo‘q edi, turmush o‘rtog‘im, farzandim bor edi. Maoshim kamayishiga rozi bo‘lishga majbur bo‘ldim. Oilamni boqishim kerak edi, shuning uchun taklifni qabul qildim. Avvaliga yarim yil o‘ynaganimdan keyin bu yerdan ketaman deb o‘ylagandim. Hattoki o‘zim bilan bir chemodan narsa oldim, xolos. Lekin barchasi o‘ylaganimdek bo‘lmadi. Bundan afsuslanmayman”.

2014-yil boshida Nego “Charlton”ga borib keldi va shundan keyin 7 yil davomida Vengriyada to‘p surib kelyapti. “Fexervar”da tayanch zonada, undan tashqari o‘ng qanot himoyasida, o‘ng qanot yarim himoyasida va qanot hujumchisi sifatida o‘ynadi. 242 o‘yinda 35 gol va 33 golli uzatmani o‘z hisobiga yozdirib qo‘ydi.

Nego jamoa uchun Vengriya pasportini olishga rozi bo‘ldi. FIFA qoidalarni o‘zgartirgach, Yevro uning asosiy maqsadiga aylandi

2017-yilda Vengriya pasporti bo‘yicha birinchi suhbat bo‘lib o‘tdi.

Hujjatlarni tayyorlashga “Fexervar” sport direktori yordamlashdi. Bu klub uchun foydali edi. Agarda jamoa doimiy ravishda 8 nafar vengriyalik futbolchini maydonga tushirsa Federatsiya tomonidan bonusga ega bo‘lardi. “Agar bu foydali bo‘lsa hech qanday muammo yo‘q, deb javob berdim. Terma jamoa haqida o‘ylab ham ko‘rmagandim”, — dedi Nego.

2020-yil kuzda u terma jamoadan chaqiruv oldi. Shundan buyon Yevroda ishtirok etishni orzu qiladi.

Foto: Getty Images

“Bolaligimda ko‘rgan Yevro—2000 yorqin xotiralar bilan qolgan. Muxlislar bilan to‘la stadionlar, dahshatli atmosfera, bosim, xursandchilik, ko‘z yoshlar. Mana shular uchun ham futbolchi bo‘lishni orzu qilganman. Ha, men Fransiya tarkibida Yevroda qatnashmayapman. Lekin afsuslanmayman. O‘sha paytlarda Fransiya terma jamoasiga chaqirilish uchun 0,1 foiz imkoniyatim ham bo‘lmagan”.

Nego hozir 30 yoshda. Bu uning faoliyatidagi birinchi va oxirgi musobaqa bo‘lishi mumkin. Shuning uchun o‘yinlarga jiddiy munosabatda bo‘lyapti.

“Yevro — butun umr orzu qilgan musobaqam. Farzandlarim meni futbol yulduzlari yonida ko‘radi. Har bir o‘yin Vengriya uchun juda muhim. Biz Budapeshtda o‘ynaymiz, muxlislar bu musobaqani hech qachon esdan chiqarmaydi. Vengriyani o‘z uyimdek ko‘raman. Buni so‘zlar bilan ifodalab berish qiyin. Fransiyada tug‘ilgan bo‘lsam ham, Vengriya o‘z uyim kabi. Bu yerda hamma menga mehribon. Farzandlarim Vengriyada ulg‘aymoqda, ularning venger do‘stlari bor.

Albatta, Grizmann bilan shuncha yildan keyin uchrashish yoqimli. Qachonlardir bir xonada yashaganmiz. Ajoyib davrlar edi. U butun umr xotiramda qoladi”.

Foto: Getty Images

Nego orzusiga erishdi. U Yevro—2020 da ishtirok etyapti. Muxlislarga to‘la stadion, gol eyforiyasi, Jahon Chempioni bilan durang natija. His qilish mumkin bo‘lgan eng yoqimli lahzalar.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!