Rossiyalik xonanda MakSim koronavirus sabab komaga tushdi

MakSim taxallusi bilan ma’lum bo‘lgan rus estradasining 38 yashar yulduzi Marina 2021-yil 16-iyun kuni Instagram sahifasida COVID-19 bilan kasallangani haqida ma’lumot bergan. Keyinroq ahvoli yomonlashgani tufayli xonandaga sun’iy nafas olish apparati ulangani haqida xabar berilgan.

Marina Maksimova Instagram’ga joylagan so‘nggi suratining tagida unda shamollash alomatlari paydo bo‘lgani, ammo shunga qaramay, koronavirus infeksiyasiga topshirgan testining natijasi uch marta ham salbiy chiqqanini yozib qoldirgan.

https://www.instagram.com/p/CQJZnAVpJ7q/

O‘zining konserti davomida holsizlanib, isitmalashni boshlagan qo‘shiqchining ahvoli yomonlashavergan. Shundan keyin shifoxonaga yotqizilgan Marinaning tekshiruv davomida o‘pkalarida 40 foiz zararlanish borligi aniqlangan. Shundan keyin aloqaga chiqmagan xonandaning ahvoli qanday ekanini “StarXit” sayti xodimlari bilishga muvaffaq bo‘lgan.

“O‘pkada zararlanish ko‘paygani sabab bemorda nafas olish bilan bog‘liq muammolar paydo bo‘lgan. Avvaliga shifokorlar noinvaziv nafas ventilyatsiyani sinab ko‘rgan, ammo bu yordam bermagan. Ichki a’zolarning zo‘riqishini kamaytirish va kislorod yetishmasligidan saqlash uchun Marinani sun’iy koma holati, ya’ni medikamentozlar bilan uxlatishga qaror qilingan”, — deydi shifoxonadagi manbalardan biri.

Insayderlardan tashqari, xonandaning piar-direktori Yana Bogushevskaya ham Marinaning ahvoli haqida izoh bergan.

“MakSim, darhaqiqat, o‘pkalarni sun’iy ventilyatsiya qilish apparatiga ulangan, ammo xavotirga hojat yo‘q, vaziyat tajribali shifokorlar nazorati ostida. Tunov kuni u bilan telefonda gaplashganimizda u hammasi yaxshi bo‘lib ketishini aytgan”, — degan Yana. Xonandaning chiqishi iyun oyida bo‘lishi kerak edi, ammo kasallik sabab ayrim konsertlarni qoldirish, ba’zilarini esa keyinga surishga qaror qilingan.