Prezident matbuot kotibi Sherzod Asadov ikki hafta avval koronavirusga qarshi ZF-UZ-VAC 2001 vaksinasining birinchi dozasi bilan emlangan. Bu haqda u 21-iyun, dushanba kuni o‘tkazilgan brifingda ma’lum qilgan.

Foto: “Daryo” / Madina Nurman

Jumladan, Asadov, “Sputnik” nashri muxbiri Dilshoda Rahmatovaning “Prezident administratsiyasi xodimlari vaksina olishdimi? Masalan, prezident matbuot-kotibi emlandimi? Hozirgi epidemiologik nostabil vaziyat va vaksinatsiya jarayoniga munosabat bildira olasizmi?”, degan savoliga javob berib o‘tgan.

Savolingiz uchun rahmat. O‘zbekiston Respublikasi Prezidenti Administratsiyasi xodimlarini vaksinatsiya qilish jarayonlari dastlab 65 yosh va undan yuqori yoshdagilar, surunkali kasalligi bor bo‘lgan xodimlar koronavirus infeksiyasiga qarshi emlanishi tashkillashtirildi. Bunda respublikamizda mavjud bo‘lgan vaksinalaridan foydalanildi. Xabaringiz bor, Respublika maxsus komissiyasining shu yil 25-fevraldagi qaroriga muvofiq, koronavirus infeksiyasi bilan kasallanishda xavf guruhiga kiradigan aholi qatlamlari e’lon qilingan edi. Jumladan, ommaviy axborot vositalari xodimlari va blogerlar ham birinchilar qatorida emlanishi belgilangan.

Shunga asosan, Prezident matbuot xizmati xodimlari ham may—iyun oylarida emalana boshladi. Shaxsan men, 7-iyun kuni ZF-UZ-VAC2001 (Xitoy—O‘zbekiston) vaksinasining birinchi dozasi bilan emlandim. Xabaringiz bor, bu vaksinani ishlab chiqarishda o‘zimizning olimlarning ham hissasi bor. Men shuni tanladim. Hozirgi epidemiologik vaziyat va vaksinatsiya jarayoniga to‘xtalib o‘tadigan bo‘lsak. O‘zbekiston Respublikasida 18-iyun holatiga ko‘ra, koronavirus infeksiyasi bilan kasallanganlar soni 105 219 nafarni tashkil etib, ulardan 101 018 nafari (96,0 foiz) sog‘ayib chiqqan, 717 nafari (0,7 foiz) vafot etgan.

Sizlarga ma’lumki, mart oyining ikkinchi yarmidan mamlakatimiz hududida koronavirus infeksiyasi bilan kasallanish darajasi orta boshladi. May oyining ikkinchi yarmi va iyun oyining dastlabki 10 kunligida epidemiologik vaziyat biroz barqarorlashdi (kunlik o‘rtacha kasallanish 240 holat). Biroq oxirgi kunlarda kasallanish holatlari 300 tadan 385 tagacha ortganini ko‘rishimiz mumkin.

Vaksinatsiya jarayonlariga kelsak, dastlab qamrab olinish lozim bo‘lgan xavf guruhiga kiruvchi aholi soni 4 million 112 ming 868 nafarni tashkil etadi. Ushbu maqsadlar uchun, respublikaga 660 ming doza ikki komponentli AstraZeneca va 240 ming doza “Sputnik V” hamda 4,5 million doza uch komponentli “ZF-UZ-VAC 2001” vaksinalari keltirildi.

Sherzod Asadov, O‘zbekiston Respublikasi Prezidentining matbuot kotibi 

Matbuot kotibi, shuningdek, oxirgi paytlarda karantin qoidalariga amal qilish susaygani, ko‘pchilik beparvo bo‘lib qolgani sababli kasallik yuqishi yana ko‘paya boshlagani, shuning uchun holatga e’tiborni hech susaytirmasdan, niqob taqish, antiseptik vositalardan foydalanish kabi qoidalarga qat’iy rioya qilishni davom ettirish kerakligini bildirib, barchadan ushbu qoidalarga rioya etishni iltimos qilgan. “Shunda biz o‘zimizni, oilamizni, bir-birimizni asragan bo‘lamiz”, — deydi Asadov.