Namanganda jurnalist va blogerlar kasb bayrami arafasida merganlikda o‘zini sinab ko‘rdi

Namanganda O‘zbekiston mudofaasiga ko‘maklashuvchi “Vatanparvar” tashkiloti viloyat kengashi tomonidan jurnalist va blogerlar o‘rtasida o‘q otish musobaqasi o‘tkazildi. Bu haqda “Daryo” muxbiri Azizbek Abduvaliyev xabar bermoqda.

“Vatanparvar” tasarrufidagi o‘q otish majmuasida ilk bor tashkil etilgan mazkur musobaqada 60 nafardan ortiq jurnalist, operator va bloger merganlikda o‘zini sinab ko‘rdi.

Ular orasida ayollar ham oz emas edi.

— OAV xodimlari uchun sportning texnik-amaliy turlari bo‘yicha musobaqa tashkil qilishni anchadan beri rejalashtirib yurardik. Ularning kasb bayramlari arafasida bu rejani amalga oshirdik. Musobaqa ularga ham ma’qul keldi degan umiddaman, chunki oralarida ilk bor o‘q otish majmuasiga kelgan va qo‘liga pnevmatik qurol tutganlar ham ko‘p ekan. Kelgusida bunday turnirlarni muntazam uyushtirib borish va o‘q otish qatoriga kartingni ham kiritish niyatidamiz, — deydi viloyat kengashi raisi Ahmadjon A’loxo‘jayev.

Musobaqada birinchi o‘rinni Namangan viloyat teleradiokompaniyasi operatori Dilmurod Musayev, ikkinchi o‘rinni viloyat Axborot va ommaviy kommunikatsiyalar boshqarmasi boshlig‘i Alibek Ergashev, uchinchi o‘rinni esa O‘zA fotomuxbiri Hotam Mamadaliyev qo‘lga kiritdi.

Ularga tashkilotchilarning diplomlari va qimmatbaho sovg‘alari taqdim etildi.

Shuningdek, musobaqaga kelgan har bir jurnalist va blogerga 27-iyun — Matbuot va ommaviy axborot vositalari kuni munosabati bilan esdalik sovg‘alari topshirildi.