Samarqand va Qarshida o‘tkazilgan tezkor tadbirlarda noqonuniy yer sotish bilan bog‘liq holatlarning oldi olindi. Bu haqda “Daryo”ga DXX matbuot xizmati xabar qildi.
Qayd etilishicha, Samarqandda fuqaro xotinining nomiga 2020-yil iyulida auksion orqali Jomboy tumanidagi 2 gektar yer maydonini sotib oladi. U yerni 2 yilda 1 milliard so‘m investitsiya kiritish sharti bilan oladi.
Muqaddam IIO va soliq idoralarida rahbar lavozimlarida ishlagan mazkur shaxs ushbu yer maydonining 40 sotixini hokimiyatdagi tanishlari orqali kadastr hujjatlarini rasmiylashtirib, xaridor nomiga o‘tkazib berish uchun 19,5 ming AQSh dollari talab qilgan.
U oldindan 15 ming AQSh dollarini olgan vaqtida tezkor tadbirda qo‘lga olindi.
Qarshi shahrida esa Qarshi tumani hokimligida qishloq xo‘jaligi bo‘limi mutaxassisi boshqaruvidagi fermer xo‘jaligi balansidagi 9 gektar suvli yer maydonini 9,5 ming AQSh dollariga sotgan vaqtida qo‘lga olindi.
Aniqlanishicha, u muqaddam firibgarlik jinoyati bilan sudlangan.
Hozirda ushbu shaxslarga nisbatan Jinoyat kodeksining tegishli moddalari bilan jinoiy ish qo‘zg‘atilib, tergov olib borilmoqda.
Bundan avval Buxoroda fuqarodan pul talab qilgan soxta Milliy gvardiya xodimi qo‘lga olingani, Toshkentda serjantlar tayyorlash maktabiga 12 ming dollarga o‘qishga kiritib qo‘ymoqchi bo‘lganlar ushlangani hamda Andijonda o‘g‘lining fermer xo‘jaligiga tegishli 10 sotix yerni 6 ming dollarga sotmoqchi bo‘lgan shaxs qo‘lga olingani haqida xabar berilgandi.
Izoh (0)